Deputación de Lugo

Máis de 2.500 lucenses participaron na selección dos 193 postos do Ben Empregado 3! Máis social

- En www.deputacionlugo.gal están publicados os resultados das probas. Poden consultarse dúbidas ata o luns incluído en 982-260-055. As persoas coas puntuacións máis altas poden entregar xa a documentación necesaria para continuar no proceso - 1.790 parados lucenses optan aos empregos en 116 empresas ás que se lle financia o 50% dos custos laborais; outros 400 con capacidades diferentes ou en risco de exclusión social aos de 36 entidades co 100% da axuda; e 341 aos de 26 colectivos sen ánimo de lucro, que tamén reciben a totalidade da subvención - Son un total de 193 novos postos de traballo en 178 empresas e asociacións dos 67 Concellos os que custea durante 1 ano o Goberno da Deputación con 2,4 millóns

O Presidente, Darío Campos Conde, avanzou este xoves que foron máis de 2.500 os desempregados lucenses que participaron durante estas semanas nas probas de selección que tiveron lugar no Pazo de San Marcos para os 193 novos postos de traballo en toda a provincia, que ofrece o Goberno da Deputación a través do Ben Empregado 3! Máis social. Campos Conde informou que hoxe mesmo se publicou en www.deputacionlugo.gal os resultados provisionais de ditas probas. Todas os participantes con dúbidas ao respecto poden consultalas ata o luns incluído no 982-260-055. As persoas coas puntuacións máis altas, que son os preseleccionados, poden entregar xa a documentación correspondente para continuar no proceso.

Unha vez transcorrido o prazo de dúbidas e os participantes entreguen a documentación necesario que se lle require, nas vindeiras semanas publicarase a listaxe definitiva dos 193 parados lucenses que comezarán a traballar en 178 empresas e colectivos sociais sen ánimo de lucro dos 67 Concellos. Os contratos contarán con cláusulas sociais para blindar os dereitos dos novos traballadores. Os seus custos laborais de 1 ano serán financiados cos 2,4 millóns de euros que achegou o Executivo Provincial á terceira edición desta programación de emprego na provincia.

Por liñas, a participación nas probas foi a seguinte:

- Liña 1A: máis de 1.790 desempregados lucenses participaron nas probas selección para traballar en 116 empresas da provincia ás que o Goberno da Deputación lle financia o 50% dos custos laborais dos novos traballadores.

- Liña 1B: máis de 400 desempregados lucenses con capacidades diferentes ou en risco de exclusión laboral participaron nas probas selección para traballar en 36 empresas da provincia ás que o Goberno da Deputación lle financia o 100% dos custos laborais dos novos traballadores co obxectivo de favorecer a súa inserción laboral unha clara aposta pola integración social.

- Liña 2: máis de 340 lucenses en paro participaron nas probas de selección para traballar 26 colectivos sociais sen ánimo de lucro aos que o Goberno da Deputación lle financia o 100% dos custos laborais dos novos traballadores.