A Área de Cultura da Deputación programou un espectáculo de circo nos xardíns do Pazo de San Marcos
![](/sites/deputacionlugo.org/files/Imagenes/0_3222_1.jpg)
Os xardíns da Deputación acolleron ao numeroso público que se achegou para presenciar as acrobacias e malabares do Combinado Galego de Novo Circo. Ademais dos acróbatas, que desenvolven a súa actuación nunha espectacular montaxe que lles permite sobrevoar aos espectadores, este espectáculo circense basease nos xogos malabares e nos números de clown. A actuación dos acróbatas foi acompañada por música en directo con tres instrumentistas que animaron as acutacións interpretando temas de fanfarria. A área de Cultura incluíu este espectáculo, dentro da súa programación de Cultura Aberta nos Xardíns da Deputación, co ánimo de dar presenza ao maior número posible de disciplinas artísticas. O Combinado Galego de Novo Circo está formado por avezados acróbatas e malabaristas con anos de experiencia que pretende, baixo este nome, dar forma a un proxecto de futuro que poña en valor esta especialidade artística emerxente no noso país. A programación de actuacións en Cultura Aberta nos Xardíns da Deputación tenta cubrir o baleiro de programación cultural que se da na cidade durante o verán e esta a ter unha gran acollida por parte do público que acude en grande número, aos xardíns da Deputación, para presenciar as actividades programadas. Para todos os asistentes a apertura deste espazo supón descubrir un lugar idóneo para a celebración de eventos culturais que ata o de agora permaneceu pechado á cidadanía.