Continúa o curso de médula de roten e vimbio no centro de cestería do río Rato
O Centro de Artesanía e Deseño, dependente da Deputación de Lugo, está a impartir desde o pasado luns o primeiro curso de cestería de médula de roten e vimbio, que se enmarca dentro da programación de verán de cestería do CENTRAD. Desde este mes ata finais de agosto as artesás Carmen Fieiras e Idota Cuesta e o artesán Carlos Fontales impartirán os 4 obradoiros nos que se tratará esta modalidade. Neste senso, desde o luns 30 ata o 11 de xullo, os asistentes descubrirán unha técnica na que se emprega a médula de roten, madeira tropical, de orixe asiática, cuia versatilidade permite que sexa máis manexable que outros materiais como o vimbio. Trátase, ademais, do primeiro curso de cestería no que participan alumnos de todas as idades, de xeito que o único requisito que se lles pide é que superen os 8 anos. O obradoiro dispón de 40 horas de formación e desenvólvese no Centro de Cestería do río Rato de 16:30 a 20:30 horas. En total conta con 10 participantes, que elaborarán distintos tipos de cestos de médula sobre madeira e base tecida, e de vimbio sobre base redonda e ovalada. O seguinte curso no que se perfeccionará esta modalidade dará comezo o 14 de xullo e rematará o 24 deste mes. Neste caso, será impartido pola artesá Idoia Cuesta. Nestes obradoiros o custe da matrícula é de 40 euros.
