O Presidente visita as obras da estrada do Seoane-Hospital nas que a Deputación leva investidos 1,5 millóns de euros
En marzo rematarán as obras de asfaltado do último treito ampliado O Presidente da Deputación, José Ramón Gómez Besteiro, visitou esta mañá as obras de asfaltado que se están a realizar na estrada CP-1301 de Seoane ó Hospital. Acompañado polo Deputado da Área de Infraestruturas, Manuel Martínez, e o Alcalde de Pedradita, José Luis Raposo, Gómez Besteiro destacou que a Deputación leva investidos preto de 1,5 millóns euros na ampliación e mellora desta estrada que comunica os Concellos de Folgoso do Courel e Pedrafita. Esta obra estaba empantada desde hai 10 anos, e tiveron que chegar os socialistas para desbloqueala e poñela a funcionar. O máximo responsable provincial que, pouco despois da súa toma de posesión, comprobou in situ os graves problemas que presentaba esta vía, subliñou que o compromiso que asumimos hai un ano cos veciños do Courel e da Montaña luguesa está cumprido. Esta é unha estrada estratéxica para as comunicacións da zona e agora pode circularse por boa parte dela con seguridade e fluidez. En definitiva, temos unha estrada de primeira para unha zona de primeira. Pola súa banda, o Alcalde de Pedradita, José Luis Raposo, dixo que tivo que chegar un goberno socialista para dar solución a esta vía, pero non é un caso único, porque hai moitos outros, como en Navia ou Cervantes. A Deputación está a realizar moitas actuacións na Montaña, pero son obras de calidade e non trapalladas, coma antes. Na visita tamén participaron varios veciños da zona que agradeceron ó apoio e o esforzo realizado pola Deputación xa que antes estaban incomunicados e tiñan que dar un grande rodeo. Obra estratéxica Esta vía, que tiña unha plataforma de 5,5 metros pasa agora a ter 8 metros de ancho. Neste momento estanse a realizar os traballos de asfaltado do último treito ampliado, entre os puntos quilométricos 1,7000 ó 4.000. Estas obras corresponden a un POL 2006 e teñen un presuposto de 240.000 euros. As obras, que inclúen aglomerado en quente, sinalización horizontal e a colocación de biondas e estarán rematadas a mediados de marzo, polo que esta importante estrada da Montaña terá unhas condicións axeitadas para a circulación dos veciños da zona e dos visitantes que se acheguen a zona. Desde que chegou o actual equipo de goberno, a Deputación investiu nesta estrada 1.424.982 euros distribuídos en 4 proxectos de ampliación e asfaltado.
