A Deputación adxudica provisionalmente o proxecto da Escola de Enxeñería Civil a PO2 Arquitectos
Aprobáronse 15 contas xustificativas do Plan de Comunidades Veciñais 2008 por valor 284.571 euros, dos que a Deputación achega 165.490 Tal e como anunciou onte o Presidente da Deputación, José Ramón Gómez Besteiro, a Xunta de Goberno aprobou este venres, por vía de urxencia e fóra da orde do día, a adxudicación provisional do proxecto da Escola de Enxeñería Civil que a institución provincial construirá no Campus de Lugo. O voceiro provincial socialista, Antonio Gato Soengas, subliñou que onte houbo a Mesa de Contratación na que a empresa seleccionada, das 27 que optaban á redacción do proxecto, foi PO2 Arquitectos e hoxe xa estamos aprobando a súa adxudicación. É un edificio prioritario tanto para nós como para a Universidade. Gato Soengas lembrou que a redacción do proxecto realizarase nun prazo de tres meses e supoñerá un investimento de 119.480 euros. O edificio custará 4 millóns de euros, que serán financiados ó 50% pola institución provincial e a USC. Será un edificio funcional, no que se poida prestar unha formación académica de calidade. Coa súa construción aumentamos a actividade universitaria. Logo da posta en funcionamento da UNED, agora ofrecémoslles ós estudantes da provincia e de toda Galicia a posibilidade de cursar tamén en Lugo as carreiras de Enxeñería de Obras Públicas e Topografía. O novo inmoble universitario terá 4.000 metros cadrados construídos, así como un espazo adicado ás prácticas coa creación de 8 laboratorios: 6 de topografía, catografía, teledetección, fotometría e proxectos, e 2 de materiais e xeotecnia. Ademais contará cun tanque de oleaxe. Outros acordos da Xunta de Goberno Na Xunta de Goberno tamén se deu o visto e prace a 15 contas xustificativas do Plan de Comunidades Veciñais de 2008, que suman 284.571 euros, dos que a Deputación achega 165.490. Pertencen ós Concellos de Baleira, Burela (2), Castroverde, Carballedo, Castro de Rei, Cervantes, Cervo, Cospeito, Foz, O Incio, O Páramo (2), Sober e Ribas de Sil.
