A Área de Cultura e Deporte establecerá unha liña de axudas destinada aos concellos tras o temporal
Antonio Veiga non descarta que nos vindeiros días se reciban máis informes que proveñan dos municipios máis pequenos O delegado da Área de Cultura e Deporte, Antonio Veiga, fixo público esta maña, no transcurso da rolda de prensa posterior á Xunta de Goberno, un balance provisional no que se cuantifican os danos materiais ocasionados polo temporal Klaus nas instalacións deportivas e culturais existentes nos distintos concellos lucenses. A través desta área, a Deputación pretende sufragar unha parte ou a totalidade destes arranxos mediante a concesión dunha serie de axudas, complementarias ás dispostas pola Consellería de Cultura e Deporte da Xunta de Galicia, unha vez que o persoal técnico da área revise en profundidade a documentación presentada polas administracións locais. O pasado 28 de xaneiro, a Vicepresidencia Primeira da Deputación, a través da Área de Cultura e Deporte, púxose en contacto con todos os concellos de Lugo para avaliar, de forma conxunta, os danos materiais ocasionados polo temporal, mediante o envío dunha misiva na que se instaba aos concellos afectados ao envío dunha memoria na que se indicasen, de forma pormenorizada e de existir, os estragos sufridos nas estruturas deportivas e culturais da zona. Ademais, tamén se lles solicitou a entrega dun orzamento aproximado onde aparecesen reflectidos os custos de execución das obras de reparación. No transcurso da rolda de prensa, Antonio Veiga comentou que a día de hoxe, un total de 14 concellos lucenses A Fonsagrada, A Pontenova, Baralla, Barreiros, Becerreá, Cervo, Guntín, Monforte de Lemos, O Vicedo, Pontón, Portomarín, Quiroga, Sarria e Xove- remitiron xa a documentación solicitada polo persoal técnico da Área de Cultura e Deporte, quen se encargará de revisar e corroborar a veracidade das memorias e orzamentos recibidos. Acto seguido, Veiga tamén recalcou que os danos máis habituais referidos polos concellos, no que atinxe ás instalacións deportivas, refírense a caída ou destrución parcial dos peches perimetrais, de parte dos tellados ou das gradas e redes dos polideportivos ou campos de fútbol municipais. Por outra banda, pequenos estragos nos tellados e problemas nos cadros da luz parecen ser os estragos máis habituais nas instalacións culturais dos distintos concellos lucenses. Para a Área de Cultura e Deporte, tal e como comentou Antonio Veiga, a rehabilitación e conservación dos espazos deportivos e culturais existentes ao longo da nosa xeografía é un dos obxectivos que nos marcamos ao facernos cargo destas áreas e, proxecto no que levamos traballando dende hai máis dun ano e medio. Ademais, o delegado de Cultura e Deporte recalcou novamente o compromiso de colaboración incondicional adquirido cos concellos por parte desta institución. Evitar un oco nas arcas municipais e axudar a aqueles municipios que contan dun orzamento máis reducido son algún dos piares deste plan de acción posto en marcha polo nacionalistas. A pesares de non ter previsto ningún prazo de entrega, o persoal técnico da área e o delegado agardan que nos vindeiros días se podan recibir novos informes que proveñan dalgún concello pequeno que non dispoña, por exemplo, dunha persoa cualificada para a elaboración dos citados documentos.