Sombreiros de Noia e paxes do litoral galego, elementos que se fabricarán nos vindeiros cursos de cestería
A cestería de palla e a tradicional galega de vimbio centran os próximos cursos que organiza o Centro de Artesanía e Deseño da Deputación. No primeiro caso, que é a terceira parte desta modalidade que xa se impartiu en edicións anteriores, os participantes construirán o sombreiro de palla típico da localidade coruñesa de Noia. Será impartido por María de la Cruz Isabel Torre Quintáns e desenvolverase os días 21 e 22 de marzo no Centro de Cestería do río Rato de 10:00 a 14:00 e de 16:00 a 20:00 horas. A vindeira semana o artesán Carlos Fontales impartirá, dentro da cestería tradicional galega de vimbio que é unha constante na programación do CENTRAD, o curso no que se elaborarán paxes da mariña luguesa e coruñesa, concretamente da zona de Viveiro e Betanzos. O da provincia da Coruña é a primeira vez que se fabricará no centro do Rato. Fontales pretende así recuperar esta técnica da que non existe constancia na actualidade. Para iso tomará como base as fotografías sacadas do Museo do Pobo Galego de Santiago de Compostela. O paxe de Betanzos caracterízase por ser un dos cestos máis perfeccionados e evolucionado dentro cestería tradicional galega de vimbio. O obradoiro desenvolverase desde o 23 ó 26 de marzo de 16:00 a 20:00 horas. Nos dous cursos, o prazo de inscrición poderá realizarse ata dous días antes do comezo de cada un, chamando ó número de teléfono: 982 26 01 66. Obradoiros portátiles Os obradoiros portátiles de tapiz, cestería e instrumentos musicais destinados a escolares de Primaria e Secundaria organizados tamén polo CENTRAD continúan o seu percorrido polos distintos colexios da provincia. Deste xeito, esta fin de semana o CEIP Luis Díaz Moreno de Baralla acollerá o de cestería. A vindeira semana será a quenda do IES Illa de Sarón e o CEIP Santa María de Fonsagrada. Asimesmo, o de instrumentos musicais trasládase esta fin de semana ó IES da Pinguela de Monforte. Pola súa banda, o CEIP Juan Rey de Lourenzá acollerá o de tapiz, os días 23, 24 e 25 de marzo. O obxectivo destes obradoiros é recuperar os oficios artesanais desde a etapa escolar dándolles ós rapaces a oportunidade de aprender e coñecer oficios de grande tradición na provincia.
