Besteiro destaca o carácter único da Feira da Verza de Guitiriz e anima a difundir un produto cun gran potencial
O Presidente da Deputación de Lugo, José Ramón Gómez Besteiro, foi o pregoeiro da Feira da Verza e do Lacón Cocido que a parroquia guitiricense de Labrada celebra cun gran éxito de participación dende que arrancou no ano 2008. Besteiro destacou na súa intervención ante os numerosos asistentes o carácter único desta cita en Galicia e practicamente en España. Hasta Torremolinos temos ir para ver unha celebración semellante a esta. Fixádevos se tedes unha festa especial, sinalou o Presidente provincial, que deu os seus parabéns ós veciños por poñer en marcha unha iniciativa, na que tamén lles recoñeceu un destacado papel como padriños á Alcaldesa, Regina Polín, a quen sei que lle roldaba a idea pola cabeza dende o 2003, e ó párroco, Luis Ángel Rodríguez Patiño, quen, dinamizando o movemento asociativo, creou o caldo de cultivo propicio para que arrancase a festa.
Gómez Besteiro animou ós veciños de Labrada a seguir cultivando e promocionando a verza, pois este produto, que foi imprescindible na dieta dos galegos dende sempre, ten un gran potencial culinario, do que a cociña de vangarda se está dando conta, e ademais a súa variedade rizada, a propia de Guitiriz, é máis branda e suave, sabe mellor. Temos que contribuír entre todos a poñela de moda, indicou. Neste senso, convidou ós produtores a ter en conta a vía de comercialización que supón a marca Lugo Sabe creada pola Deputación e estudar a posibilidade de acollerse a ela. Recordou que os 150 primeiros produtos elaborados baixo este distintivo están á venda dende onte mesmo nos supermercados Cemar e en catro estacións de servizo da A-6, precisamente en Guitiriz e O Corgo.
A unión veciñal que fomenta a Feira da Verza foi outros dos elementos que gabou Besteiro do festexo, pois mobiliza ós 320 veciños desta parroquia e atrae a ducias de persoas de localidades dos arredores, sobre todo de Xermade, e do resto da provincia. Convértese deste xeito ademais nun reclamo para que as xentes doutros lugares se animen a coñecer o fermoso que é Guitiriz en xeral e Labrada en particular, parroquia na que, apuntou o Presidente, se encontran dous dos tesouros do patrimonio cultural do municipio: a igrexa de Santa María e o conxunto monástico da Granxa, e que destaca por ser o núcleo con máis cruceiros do Concello e albergar canteiras de granito silvestre, un dos poucos lugares de Galicia nos que existe.
Tras a lectura do pregón, comezou a sesión vermú a cargo da orquestra Súper Fama e tivo lugar unha comida campestre a base de caldo de verza e cocido. Xa pola tarde, entregáronse os premios ás mellores cestas adornadas con verzas e produtos da matanza, houbo un concurso de baile, organizado coa colaboración do Club de Pensionistas de Guitiriz, e unha churrascada para cear. Ademais, ó longo de toda a xornada houbo unha exposición de maquinaria. De amenizala verbena ocupouse de novo a agrupación Súper Fama.
