Éxito de convocatoria do encontro de Eurovisión organizado pola Deputación en San Marcos
![](/sites/deputacionlugo.org/files/Imagenes/0_5170_1.jpg)
O encontro de apoio a Lucía Pérez organizado este sábado pola Deputación de Lugo nos xardíns do Pazo de San Marcos tivo un gran éxito de convocatoria. Ducias de persoas se achegaron á sede do organismo provincial para animar á cantante do Incio no seu paso polo Festival de Eurovisión nunha xornada lúdica que se desenvolveu baixo o lema Todos con Eurovisión. Todos con Lucía. Todos na Deputación de Lugo e na que houbo numerosas actividades gratuítas pensadas para tódolos públicos e sorteos, ademais da retransmisión en directo do certame da canción en dúas pantallas xigantes, instaladas nos propios xardíns e no salón de actos.
Entre os asistentes estiveron as deseñadoras lucenses que vestiron a Lucía Pérez para a súa actuación, Sara Lage e Maru Calderón, e representantes da zapatería que lle cedeu o calzado, Dick & Paul. Todos os participantes gozaron a partir das 18:00 horas de karaokes, xogos hinchables e talleres para elaborar chapas e bandeirolas coa imaxe da primeira representante galega de España en Eurovisión. O Centro de Innovación Social In Lugo, o primeiro destas características en Galicia, instalou unha pista de baile virtual na que pequenos e maiores puideron practicar todo tipo de pasos de danza. Así mesmo, a Fundación TIC mostrou nun obradoiro como ser cámara de televisión e elixiu entre o público a través dun cásting colaboradores para apoiar ó presentador que se ocupou de guiar a gala.
Tamén se ofreceron degustacións gratuítas de Lugo Sabe, a marca creada pola Deputación para poñer en valor os produtos autóctonos. Sete empresas que acadaron este distintivo de calidade cederon de balde artigos de alimentación, como embutidos, queixos, pan, empanadas e doces. As firmas colaboradoras no evento foron: Queixos Pacita, Jamones González, Daniberto, Torre de Núñez, Panadería Concha e pastelerías La Esquina e La Alianza, ademais da cadea de supermercados Cemar, que distribúe nos seus establecementos os produtos de Lugo Sabe.
Ó longo da tarde tamén houbo visitas guiadas en pequenos grupos polas inmediacións do edificio da Deputación nas que técnicos do Plan Urban, impulsado polo Concello lucense e a institución provincial, explicaron en que consisten as obras de remodelación e mellora que se están levando a cabo nos propios xardíns e na praza de San Marcos, e como quedarán estes espazos tralas actuacións, que concluirán neste mes. Deste xeito, os participantes nos circuítos tiveron a oportunidade de coñecer por exemplo que especies arbóreas se plantarán na praza de San Marcos e por que; como a parte traseira do pazo quedará proximamente aberta ó público, ó incorporarse ó paseo interior da Muralla, e como funcionará a rede wifi de conexión gratuíta a Internet que se está instalando.
Ás 21:00 horas comezou a retransmisión en directo de Eurovisión en dúas pantallas xigantes colocadas nos xardíns exteriores e no salón de actos da Deputación. Durante a duración do festival houbo numerosos sorteos de agasallos.