A Deputación aforra 1,5 millóns de euros ós Concellos, asumindo o servizos de banda longa e de asesoramento tecnolóxico continuo

O voceiro provincial socialista, Manuel Martínez, deu conta este venres das novas contratacións en materia de novas tecnoloxías que aprobou hoxe a Xunta de Goberno e coas que a Deputación aforra ós Concellos 1,5 millóns de euros ó asumir os servizos de banda longa e de asesoramento tecnolóxico continuo. Esta reducción de custes municipais é froito dos 25 millóns de euros que a institución luguesa soubo captar da Unión Europea, converténdose na quinta entidade local que máis fondos comunitarios recibiu na última convocatoria comunitaria.

Deste xeito e en primeiro lugar, Martínez informou sobre a adxudicación da conexión a Internet en todas as dependencias provinciais e nas 46 Casas Consistoriais dos municipios que, de xeito voluntario, se sumaron no 2011 ó Plan de Extensión de Banda Longa, enmarcado no Innova-TE. O voceiro explicou que, o ano pasado e mediante este Plan, a Deputación fixo as obras necesarias, tales como instalación de antenas ou extensión de cableado, ademais de habilitar a conexión á Rede nas Consistorios, durante 1 ano e cunha velocidade de 2 megas, con 1 millón de euros, cofinanciados nun 70% pola Unión Europea. Nesta ocasión, destacou Martínez, a institución provincial logra aforrar o 40% porque, nun só prego, leva este servizo tanto ós Concellos como a todos os edificios dependentes da Deputación -antes existían varias contratacións que encarecían este servizo-; porque incrementa o tempo de prestación de Internet a 2 anos, é dicir, ó dobre; e porque aumenta a súa calidade, acadando ós 100 megas -con dependencia das condicións orográficas da zona-. Todo isto, con máis de 1,2 millóns de euros, dos cales o 70% son fondos europeos.

Martínez remarcou que isto permitirá ós veciños dos municipios sumados ó programa tecnolóxico provincial seguir realizando 154 trámites coa administración, así como manter os seus novos portais web. Estes Concellos son: A Fonsagrada, A Pastoriza, Pobra do Brollón, Abadín, As Nogais, Baleira, Baralla, Becerreá, Begonte, Burela, Carballedo, Castro de Rei, Castroverde, Cervantes, Cervo, Chantada, Foz, Friol, Guitiriz, Láncara, Lourenzá, Meira, Mondoñedo, Monforte, Monterroso, Muras, Navia de Suarna, Negueira de Muñiz, O Corgo, O Páramo, Palas de Rei, Paradela, Pedrafita do Cebreiro, Pol, Portomarín, Quiroga, Rábade, Ribadeo, Ribas do Sil, Ribeira de Piquín, Samos, Sarria, Sober, Taboada, Triacastela e Viveiro.

Asesoramento tecnolóxico
En segundo lugar, o voceiro informou sobre a aprobación da contratación dun Servizo de Asesoramento Tecnolóxico continuo por valor de 235.410 euros, tamén cofinanciados nun 70% cos fondos europeos do Innova-TE. Trátase dun centro que se situará no Pazo de San Marcos, reforzando o labor do persoal provincial centrado nas novas tecnoloxías, que prestará servizo, a custe cero, ós Concellos e á Deputación, durante as 24 horas dos 365 días ó ano. É dicir, chamando ó teléfono 982-28-02-63, en calquera momento, persoal especializado resolverá dúbidas sobre o funcionamento da Administración Electrónica ou sobre os portais web, e ata prestará asesoramento para a realización de calquera contratación tecnolóxica que queiran levar a cabo os municipios co fin de buscar as opcións máis ventaxosas. Isto conlevará, explicou Martínez, a creación de novos postos de traballos na provincia, xa que é necesaria a incorporación de 4 profesionais do sector da innovación.

Liquidado o canon de Sober
A Deputación liquida a débeda do canon en Sober, adxudicando as derradeiras obras deste Plan, dotadas de 84.000 euros, financiados na súa totalidade pola institución provincial. Martínez informou que na Xunta de Goberno deuse conta da contratación, para a súa inmediata execución, das obras de pavimentación nos accesos ós núcleos rurais de Gullufre-Os Canares, Os Congos, A Merla, Cancomede, Sampil e Rosende.

O voceiro destacou que, en total, o organismo provincial achegou a este Concello da zona sur da provincia, “que non contaba con sentenza favorable pero si co firme compromiso deste Goberno provincial, consciente de estar ante un municipio que, dende hai anos, produce e subministra enerxía hidroeléctrica á provincia”, 445.300 euros. Este orzamento, definido en base a un prestixioso traballo elaborado por profesionais do departamento de Enxeñería Agroforestal da USC, investiuse en 11 obras, demandadas polos veciños e acordadas co Rexedor municipal.

Todas elas, á expeción das adxudicadas hoxe, estas executadas. Trátasen de: acondicionamento de accesos en Proendos, Área Recreativa, Arroxo, Santa Marta e Bolmente (39.640 euros); saneamento e abastecemento en Mer (35.142 euros); abastecemento de Carqueixa (17.083 euros); saneamento e abastecemento en Froxán (48.517 euros); acondicionamento de accesos e alumeado público en Regueiro, Nogueira, A Boca e Fervenza (41.037 euros); acondicionamento de accesos en Barantes, Barreiros y Bulso (44.962 euros); acondicionamento de accesos en Cadaval, Bananta, Piantes, Camilo e Rúa da Panadería (43.721 euros); acondicionamento de accesos en Prados, Matama e Rosende (31.887 euros); pavimentación na rúa El Progreso (58.734 euros); pavimentación accesos en A Merla, Sancosmede, Sampil e zona verde Rosende (38.160 euros); e pavimentación de accesos en Gullufre-Os Canares e nos Corgos (46.426 euros).

Obras na Mariña
O tamén Deputación de Xestión Territorial avanzou que a Deputación iniciará nos vindeiros días obras de mellora na CP-5505, de Orrea a Galegos, no Concello de Riotorto, por valor de 25.372 euros. E é que na sesión de hoxe deuse conta da contratación destes traballos para a súa inmediata execución. As actuacións consisten na reposición do firme e do drenaxe no punto quilométrico 0,600. Trátase da zona afectada polo cauce do río que discorre por debaixo deste vial.

Tamén na Mariña, concretamente para A Pontenova, a sesión deu o visto e prace á contratación de novas actuacións dotadas de 24.725 euros. Deste xeito, a institución provincial acordou investir 14.105 euros na substitución da zahorra existente no campo da festa de Vilameá, parroquia composta por 300 veciños, por formigón pulido. Ademais, tamén aprobou adquirir material urbano por valor 10.620 euros. Trátanse de bancos, papeleiras, entre outros accesorios, que se situarán na Chousa de Vilaouriz, unha zona verde do núcleo urbano pontenovés, recentemente acondiconada mediante 6 millóns de euros, cofinanciados nun 30% polo organismo provincial e nun 70% pola Confederación Hidrográfica do Norte; así como na rúa da Veiga Alta, tamén mellorada con obras de case 28.000 euros, dos que a Deputación achegou o 70%.