Expertos en economía e empresas dan na Deputación as claves dun modelo produtivo de futuro para Galicia
O ciclo de debates Galicia en clave económica, organizado pola Deputación de Lugo e Economía Digital, arrancou este mércores co primeiro encontro, no que tres expertos no ámbito económico e empresarial deron as claves dun modelo produtivo de futuro para a comunidade galega, as potencialidades sen explotar da súa economía e os novos sectores emerxentes. Máis de 160 persoas encheron o Salón de Actos de San Marcos para presenciar o foro, que inaugurou o Presidente provincial, José Ramón Gómez Besteiro, e no que participaron como poñentes Fernando González Laxe, catedrático de Economía Aplicada da Universidade da Coruña e ex Presidente da Xunta; Emilio Pérez Nieto, presidente da Asociación Galega da Empresa Familiar, e Marcelino Fernández Mallo, socio director da consultora empresarial galega Sphenia. Aínda que estaba prevista a presenza de Xoán Carmona Badía, Catedrático de Institucións Económicas da USC, finalmente no puido asistir por razóns de saúde.
Na apertura do debate, Gómez Besteiro expuxo os cinco retos que, ó seu entender, debemos afrontar os galegos para artellar un verdadeiro proxecto de país. O Presidente subliñou, neste senso, que o demográfico é o principal reto de Galicia. Somos a segunda rexión do mundo cun peor saldo vexetativo, tan só por detrás de Xapón. No 2012 morreron 10.000 persoas máis das que naceron en Galicia, e 2.000 mozos pechan a porta da nosa comunidade cada mes. Trátase dun problema real, que require políticas transversais en todas as áreas, e non accións puntuais de maquillaxe.
O Presidente avogou tamén por unha nova visión integral da economía de Galicia, volver a colocar o Estado por riba do Mercado para solucionar os problemas das persoas, así como pola participación da Administración -que somos todos- nos sectores estratéxicos do país. O contrario, as grandes privatizacións baixo o compromiso de que os servizos ían ser máis baratos e competitivos para os usuarios, resultaron un engano para a economía real das persoas.
Outros dos retos expostos por Besteiro son o cambio do concepto de produtividade e competitividade, apostando pola formación, educación de calidade, I+D+i, comercio exterior, e a suba dos salarios, ademais do incremento do valor engadido das nosas materias primas e produtos para pechar así ciclos produtivos, potenciando ó mesmo tempo o sector primario, unha das nosas potencialidades desaproveitadas.
Gómez Besteiro apostou por asentar un sector público eficaz e potente, que sexa a primeira barreira contra a desigualdade das persoas e o dinamizador do tecido económico. É preciso mellorar a produtividade e eliminar as duplicidades nas competencias. Iso é o que distorsiona o funcionamento, non a aposta polo sector público, que debe ser o principal promotor dun sistema sanitario e educativo de calidade, así como do emprego, argumentou o mandatario provincial, ademais de reivindicar, como quinto reto, unha Galicia que crea en si mesma, na súa cultura, no seu idioma e na súa historia como valores singulares que a fan máis grande, e non máis pequena, no contexto de Europa e de España, onde podemos poñer en valor o que nos diferenza como nacionalidade histórica que somos.
As claves dos poñentes
Pola súa banda, González Laxe coincidiu co Presidente en que o gran problema de Galicia é a demografía e o envellecemento, engadindo que o crecemento económico da comunidade ten que superar o 2% anual, e ser un crecemento para crear emprego, algo que non está sendo así. Outras das eivas da situación socioeconómica galega, segundo o ex Presidente da Xunta, está no mercado laboral, pois a taxa das persoas que están en idade de traballar é menor que a española. Tamén destacou que nos últimos anos Galicia pasou do posto 17 ó 4 en canto a redistribución da riqueza, e tamén baixou considerablemente a inversión pública per cápita.
Noutro orde de cousas, Laxe subliñou que a institución que tutela as caixas de aforros debería obrigar a que devolvan os recursos ós preferentistas, amosándose ó mesmo tempo moi preocupado pola reputación e imaxe de Galicia como país.
Emilio Pérez Nieto, presidente da Asociación Galega da Empresa Familiar, que agrupa a 50 firmas que sumaron en 2012 un volume de facturación de 7.600 millóns de euros, o que supón o 16% do PIB galego, remarcou a necesidade de especialización das empresas, un ámbito no que avanzamos pouco, aínda que temos bo capital humano. Pérez Nieto demandou políticas para fortalecer o sector forestal e máis posibilidades para recapitalizar as empresas.
O consultor empresarial Marcelino Fernández Mallo reivindicou pola súa parte a posta en valor da economía baseada no medio ambiente e os recursos propios: a calidade e cantidade dos nosos produtos de terra, mar e aire, ademais da nosa cultura e lingua, da que se fala pouco, lamentando neste senso que en Galicia castiguemos o valor da terra. Fernández Mallo advertiu así mesmo de que o PIB de Galicia está un 49% por debaixo do do País Vasco, polo que quizais é o momento de trocar de modelo económico.
As seguintes citas coa economía
A seguinte cita do ciclo de debates Galicia en clave económica, que conta coa colaboración do Grupo El Progreso, terá lugar en setembro e abordará o papel dos sectores público e privado ante a crise; mentres que os tres restantes afondarán nas posibles saídas do paro e os xacementos de emprego; as fortalezas e debilidades do sector primario, e o novo mapa bancario e o acceso ó crédito.
O obxectivo desta iniciativa é facer unha análise rigorosa e profunda da situación socioeconómica na que se encontra actualmente Galicia e, dando un paso máis, poñer enriba da mesa alternativas e solucións.