A mostra gratuíta Lo Sexual y Lo Sagrado recibe nun mes máis de 500 visitas na Capela de Santa María
![](/sites/deputacionlugo.org/files/Imagenes/0_10555_1.jpg)
A Capela de Santa María acolle a mostra de acceso gratuíto Lo Sexual y Lo Sagrado, do artista galego José Ortiz que, por primeira vez, expón o seu traballo en Lugo reunindo unhas corenta pezas de poliéster, madeira, latón, pan de ouro, recortes de prensa, óleo, bronce pedra, gres, ferro, lapis pastel, lapis sobre taboleiro, etc. A temática sexual define esta exposición coa que o autor trata de liberar ó sexo dos seus medos e situalo nun lugar que lle outorgue o respecto que se lle nega. Ortiz emprega a arte erótica como revulsivo deixando de lado o tabú ou o problema do sexo na sociedade. Pretende que as súas obras despexen a controversia do que é correcto e o que non, do que é bo e do que é malo, ó tempo que persegue espertar provocación e reflexión nos visitantes. Este é o motivo polo cal Ortiz pon á disposición de todos os que se acheguen á Capela un folleto no que poder deixar as impresións escritas.
O Becerro de Ouro é a peza clave desta exposición. Elaborado en poliéster, madeira, latón, pan de ouro e recortes de prensa, esta creación representa a idolatría. Ortiz relaciona cada peza da colección coa relixión, o eido místico e o ascetismo.
A mostra Lo Sexual y Lo Sagrado continuará aberta ata o 31 de agosto, co seguinte horario: de luns a venres, de 10:30 a 14:00 e de 17:00 a 20:00 horas; sábados, domingos e festivos, de 11:00 a 14:00 e de 16:30 a 20:00 horas. A entrada é totalmente gratuíta.