A Deputación creará un banco de recordos audiovisual dos maiores da provincia co programa Memoria Dixital Tic-Tac
A Deputación, a través da Fundación TIC, pon en marcha un novo programa destinado aos maiores de 55 anos da nosa provincia: Memoria Dixital Tic-Tac, un rexistro audiovisual de parte da nosa historia a través dos testemuños das persoas que participen na iniciativa. O Deputado de Cooperación e Asistencia aos Concellos e Patrono da Fundación, Álvaro Santos, que inaugurou o proxecto este xoves na residencia Carlos IV de Outeiro de Rei, dixo que crearemos un banco de recordos no que poder gardar as vivencias do nosos maiores en internet. Todo o material obtido publicarase nunha páxina web especialmente deseñada para a ocasión, permitindo así que todos teñamos acceso ás historias e recordos dunha xeración que ten moito que contar.
Un dobre obxectivo
Santos avanzou que serán os propios maiores os que graven cunha tablet pequenos vídeos onde poderán contar como foi a súa nenez, a súa vida no rural, as festas de hai anos, como se vestían ou moceaban. Deste xeito, cúmprese un dobre obxectivo: por unha banda, facer un rexistro individual da memoria a través de pequenos relatos e anécdotas e, por outra, introducir a este colectivo no mundo das novas tecnoloxías, facilitándolles o acceso directo a unha tablet para que aprendan a manexala nos seus aspectos máis básicos.
Como participar
Memoria Dixital Tic-Tac consta de 9 talleres, que se desenvolverán ata o 28 de febreiro en todas as comarcas da provincia. Está aberto a asociacións e centros de maiores e aos veciños de todos os Concellos da provincia, agás os de Lugo capital, que desexen participar. Os interesados poden apuntarse chamando o número de teléfono 982 254 666. O segundo taller desenvolverase mañá na Casa da Cultura de Portomarín cos membros da asociación de xubilados deste municipio.
Este programa, xunto a outros como Sempre en Activo ou Nutretic, está incluído na acutuación Promoción da autonomía persoal dos maiores da provincia, que xestiona a Fundación TIC a través do Centro de Innovación Social InLugo no marco Innova-TE2, financiado nun 80% con fondos europeos.
Sinxelo e entretido
Grazas ás novas tecnoloxías todo o proceso para crear este banco de recordos será moi sinxelo. Nunhas xornadas entretidas, os maiores serán os protagonistas absolutos: desde o que desexe contar unha historia, ao que queira ser entrevistador ou o cámara, ata a persoa que envíe o material por internet. Axudaráselles a realizar todas as actividades.
