Fernández Queipo presenta o Plan Invernal, composto por 112 operarios, 64 máquinas e máis de 230 toneladas de sal
O Deputado de Xestión Territorial, Argelio Fernández Queipo, presentou este mércores o Plan Invernal que ten en marcha a institución luguesa para atender as posibles incidencias na rede viaria provincial máis extensa de España, pois conta con máis de 4.200 quilómetros. Fernández Queipo destacou que co obxectivo de garantir a seguridade nas estradas e o acceso a todos os núcleos de poboación, temos despregados un total de 112 operarios e 64 máquinas, e dispoñemos de máis de 230 toneladas de sal nos 12 saleiros que se sitúan estratexicamente noutros tantos Concellos da provincia.
A Deputación de Lugo, a diferenza doutras administracións públicas do país, ofrece esta asistencia, de xeito totalmente gratuíto, a todos os Concellos da provincia que o soliciten. De feito, en intensos temporais, o organismo provincial tamén actúa en estradas da provincia de León, pois lindan coas de Lugo. A institución luguesa colabora con todas as administracións galegas nas tarefas de asistencia nas vías de diferente titularidade. Fernández Queipo destacou que o importante é, en todos os casos, atender aos nosos veciños, preservar a seguridade viaria e evitar, de todos os xeitos, que núcleos de poboación, como ten acontecido na Montaña, se queden incomunicados.
O Deputado avanzou que durante o 2015 o organismo provincial atendeu preto de 700 incidencias e empregou 1.180 toneladas de sal. Fernández Queipo informou que a rede viaria de Lugo é a máis extensa de España, xa que conta con 4.200 quilómetros de estrada, dos que máis de 1.500 quilómetros están por riba dos 600 metros de altitude e 800 a máis de 800 metros con respecto ao nivel do mar. Tendo en conta esta situación, así como a orografía da nosa provincia, é necesario un operativo ben planificado, que responda de xeito rápido e eficaz.
Zonas de actuación
Este dispositivo atópase distribuído en 8 zonas da rede viaria provincial. Por cada unha delas hai 8 vehículos- 2 máquinas quitaneves; 2 tractores con cuchilla e e esparcedor de sal; 2 todoterrenos e 2 vehículos de apoio con material mecánicos como motoserras- e 14 operarios. Isto significa que, en total, a Deputación ten 64 máquinas e 112 operarios previstos para actuar durante as 24 horas do día en calquera punto da provincia. A parte desta maquinaria, o dispositivo tamén conta con varias máquinas do parque móbil como palas mixtas ou camións, que se engaden ao protocolo de actuación se é preciso.
As zonas de actuación son:
- Zona 1, con 530 quilómetros de vías, nos Concellos do Vicedo, Viveiro, Xove, Cervo, Burela, Ourol, Muras, Xermade e Vilalba.
- Zona 2, con 618 quilómetros, no Valadouro, Foz, Alfoz, Barreiros, Lourenzá, Ribadeo, Trabada, Mondoñedo, Abadín, Riotorto, A Pastoriza e A Pontenova.
- Zona 3, con 668, quilómetros, en Meira, Pol, Castro de Rei, Cospeito, Outeiro de Rei, Rábade, Lugo, Castroverde, Baleira, O Corgo, Láncara, e Baralla.
- Zona 4, con 680 quilómetros, en Guitiriz, Begonte, Friol, Guntín, Palas de Rei, Antas de Ulla, Monterroso, Portomarín, O Páramo, Sarria e Paradela.
- Zona 5, con 332 quilómetros, en Ribeira de Piquín, A Fonsagrada, Negueira de Muñiz e Navia de Suarna.
- Zona 6, con 334 quilómetros, en Becerreá, Cervantes, As Nogais e Pedrafita do Cebreiro.
- Zona 7, con 313 quilómetros, en Triacastela, Samos, O Incio, Folgoso do Courel, Quiroga e Ribas do Sil.
- Zona 8, con 738 quilómetros, en Bóveda, Pobra do Brollón, Monforte de Lemos, Sober, Pantón, O Saviñao, Taboada, Chantada e Carballedo.
Saleiros
O organismo provincial conta con 235 toneladas de sal para os 12 silos, que se encontran en Cervantes, Folgoso do Courel, Becerreá, A Fonsagrada, Ribas do Sil, Navia de Suarna, Riotorto, O Incio, Ourol, O Valadouro, Pedrafita do Cebreiro e Lugo. Neste ano, hai destinada unha partida de 100.000 euros para a compra de fundentes, que se destinarán, de xeito gratuíto, a todos a calquera dos 67 Concellos da provincia que o necesiten.