A modalidade de “cestería andaluza de palmeira anana” centra o terceiro curso da programación
do CENTRAD
A modalidade de cestería andaluza de palmeira anana está a centrar esta semana o terceiro curso da programación de inverno do Centro de Artesanía e Deseño, dependente da Deputación de Lugo. Ata o venres, día 15 de febreiro, os asistentes, logo dunha correcta identificación dos materiais, aprenderán a aplicar distintas técnicas para a elaboración de pleitas, cordóns, asas, salvamanteis e paneiras. O curso, dotado de 40 horas, é impartido por Antonio Rodríguez en horario de 10:00 a 14:00 horas e de 16:00 a 20:00 horas. Consta de 8 prazas e está dirixido a cesteiros, artesáns e ó público en xeral. Esta actividade inclúese dentro da programación do CENTRAD para o ano 2008. Obradoiros portátiles Os obradoiros portátiles destinados a escolares de Primaria e Secundaria organizados polo CENTRAD continúan polos distintos colexios da provincia. Tapiz e fabricación de instrumentos musicais son as modalidades que se están a impartir esta semana nos centros educativos. Ata o día 14 de febreiro os alumnos do Colexio de Cervantes coñecerán as distintas modalidades de tapiz. Esta actividade repetirase o venres, día 15, e o sábado 16 no colexio do Landro de Viveiro. Pola súa banda, o de instrumentos musicais que se está a impartir no CEIP de Castroverde rematará o día 14 de febreiro. Durante a fin de semana, será a quenda dos alumnos do Colexio de San Xoán de Becerreá. O obxectivo dos mesmos é recuperar os oficios artesanais desde a etapa escolar dándolles ós rapaces a oportunidade de aprender e coñecer oficios de grande tradición na provincia. 954 escolares de 35 colexios da provincia serán os destinatarios destes obradoiros. Artesáns do Centro de Artesanía e Deseño imparten estes cursos que se están a desenvolver por toda a provincia. A vindeira semana tocaralle ós colexios Galen e As Mercedes de Lugo, así como ós CEIP da Pontenova e IES A Pinguela de Monforte.
