A Deputación aproba a adquisición de material para o Consorcio de Bombeiros por 3 millóns de euros
A Vicepresidenta Segunda da Deputación esixe unha rectificación pública ó PP por acusar ó Presidente provincial de facer un anuncio electoralista cando este acordo é unha realidade A Xunta de Goberno deste venres aprobou a adquisición vehículos e equipamento destinado ó Consorcio Provincial contra incendios e salvamento de Lugo por valor de 2.936.199 euros. A Vicepresidenta Segunda, Lara Méndez, sinalou que para nós este é un tema absolutamente prioritario, dada a grave carencia que sufría a provincia en materia de emerxencias. O goberno provincial aprobou os pregos de condicións para a contratación da subministración da seguinte dotación con destino ó Consorcio : - 1 Vehículo de rescate en altura: 555.000 euros. - 4 vehículos urbanos lixeiros : 978.149 euros (244.687 cada un) - 2 Vehículos mixtos de extinción e rescate en altura: 991,451 (495.726 cada un). - 5 Vehículos de mando todo terreo: 175.000 euros (35.00 cada un). - Un equipamento por valor de 236.600 euros. Lara Méndez dixo que esta dotación é o que se considera máis urxente. Despois irase adquirindo o resto ata dotar por completo os 5 parques incluídos no Consorcio (Viveiro, Barreiros, Vilalba, Sarria e Chantada). Por tanto, a prioridade demostrámola con feitos. Este xoves o Consello da Xunta de Galicia aprobou o Consorcio Provincial contra Incendios e Salvamento de Lugo, pero a Deputación e a Consellería de Presidencia xa adiantamos o traballo: o Consorcio dispón neste momento de 5 bombas nodriza que suman preto de 1 millón de euros. E hoxe aprobamos a contratación da dotación máis urxente por outros 3 millóns de euros. Rectificación pública Con respecto a este asunto, a Vicepresidenta Segunda esixiu ó Partido Popular unha rectificación pública por acusar ó Presidente da Deptuación de facer esta semana na Mariña un anuncio electoralista sobre os parques de bombeiros. O que hoxe aprobamos é unha realidade, e é lamentable que nin siquera se conceda o beneficio da dúbida á palabra dada polo Presidente. Lara Méndez afirmou que os populares practican unha política de patio de gardeiría e non se enteran, ou o que é peor, pretenden confundir ós veciños e restar importancia a este Consorcio que é unha das principais prioridades deste equipo de goberno. Estatuto Básico de Emprego Público Por outra banda, a Vicepresidenta Segunda anunciou que a semana que vén, dos días 11 ó 13, celebrarase na Deputación un Curso sobre o Estatuto Básico de Emprego Público, que data de 2007, e que responde a un precepto constitucional. O curso denomínase: Estatuto Básico do Emprego Público: xestión do cadro de persoal dos postos de traballo. Implantación da carreira profesional. Avaliación do desempeño. Aspectos esenciais da negociación colectiva. Está destinado a Secretarios de Concellos da provincia de Lugo e, en xeral, a empregados públicos locais que desenvolvan a súa actividade no ámbito da xestión dos Recursos Humanos. Este ano haberá dúas edicións. A desta semana, e outra en abril. Cada unha ten 20 prazas.Esta actividade despertou moito interese, como o demostra o feito de que se presentasen 80 solicitudes. Por iso está previsto que se volva a incluír na oferta formativa do ano que vén, apuntou Lara Méndez.
