Besteiro define ós seus representantes para o Consello de Administración de SUPLUSA
O Presidente da Deputación, José Ramón Gómez Besteiro, vén de definir ós representantes do grupo provincial socialista que integrarán o Consello de Administración da Sociedade Urbanística Provincial. É o órgano de dirección de dito organismo dependente da institución, responsable último das iniciativas impulsadas por SUPLUSA. O Pleno deste mes aprobará a proposta de Gómez Besteiro na que plantexa nomear conselleiros de dita Sociedade a Pilar García Porto, Sonsoles López Izquierdo, Miguel Ángel Soutela Vega e Juan José Díaz Valiño. Este cambio débese á nova composición da Corporación Provincial.
O Consello de Administración de SUPLUSA estará composta a maiores, polo propio titular provincial, representantes de todos os grupos políticos (PP e BNG), así como por un Secretario, Xerente, Tesoureiro, Interventor e Director Técnico. Entre os seus principais cometidos atópase a aprobación do orzamento da Sociedade para 2012, a posta en marcha das obras de construción das 12 primeiras residencias con centros de día na provincia, a creación de máis solo industrial en Lugo ou o desenvolvemento do proxecto de PACADAR, permitindo situar na área industrial de Monforte de Lemos a nova factoría desta entidade de prefabricados de formigón e crear máis de 100 postos de emprego nesta Comarca.
O perfil axeitado
Tendo en conta a responsabilidade deste órgano, para a elección dos conselleiros Gómez Besteiro avaliou o perfil dos seus posibles candidatos, decantándose finalmente pola Deputada de Economía, Recadación e Facenda, Pilar García Porto, como encargada das contas da institución; a Deputada de Medio Ambiente e Enerxías Renovables, Sonsoles López Izquierdo, como defensora do desenvolvemento sostible da provincia; o Deputado de Goberno Interior, Miguel Ángel Sotuela Vega, como bo coñecedor de SUPLUSA, organismo que estivo ó seu cargo durante o pasado mandato ó asumir a área de Urbanismo; e o Deputado de Cooperación e Asistencia ós Concellos, Juan José Díaz Valiño, encargado de coñecer polo miúdo as necesidades dos 67 municipios lugueses.
