Miles de persoas coñeceron a riqueza dos Ancares co expositor que levou a Deputación a un centro comercial da Coruña
Miles de persoas coñeceron durante este mes a riqueza medioambiental dos Ancares Lucenses co expositor que a Deputación levou ó centro comercial Dolce Vita, da Coruña. É unha das actividades de difusión das Reservas da Biosfera, que se inclúe no convenio entre o organismo provincial e o Ministerio de Medioambiente. Mediante este acordo, dotado de 1 millón de euros cofinanciados nun 66% por fondos estatais, o organismo provincial está a executar un plan de acción para potenciar os espazos naturais recoñecidos pola UNESCO dos que é responsable.
Mostra delo, dende o 3 de maio ata este sábado, a institución amosou ás preto de 220.000 persoas que visitaron dita área comercial -datos da xerencia do centro- os recursos medioambientais, etnográficos e culinarios dos Ancares. E é que no stand os visitantes recibiron información sobre as posibilidades turísticas da zona -por exemplo as súas rutas de sendeirismo ou casas rurais-, tiveron a oportunidade de ver unha réplica dunha palloza cunha exposición no seu interior sobre os oficios artesanais, así como desgustar produtos tales como derivados do Porco Celta. Ademais, coñeceron polo miúdo a oferta de produtos autóctonos coa 1º plataforma de comercio electrónico da provincia que puxo en marcha a Deputación. Deste xeito, Puideron entrar en www.losprodutosdelugo.com e comprobar o sinxelo que é mercador produtos lucenses as 24 horas dos 365 días do ano. Como actividades complementarias, houbo sorteos de estancias en casas de turismo rural e de cestas de produtos dos Ancares, así como obradoiros de oficios artesanais.
Con esta iniciativa, a institución luguesa continúa impulsando o desenvolvemento das Reservas da Biosfera das que é xestora -Terras do Miño e os Ancares Lucenses- tal e como recolle o convenio co Goberno Central. O seu obxectivo é difundir entre a cidadanía en xeral e entre os profesionais dos sectores vinculados a todo o relacionado co medio ambiente, en particular, as características e recursos destes espazos Reservas da Biosfera, para garantir a súa conservación, atraer visitantes e dinamizar a economía dos seus territorios a través dunha xestión sostible.
