A Deputación gaña a demanda pola que a empresa Gazeley lle reclamaba case 4 millóns de indemnización
A Deputación de Lugo gañou a demanda pola que a empresa Gazeley, filial dunha multinacional británica que pertence á súa vez a un grupo con sede en Dubai, lle reclamaba unha indemnización de case 4 millóns de euros por un suposto incumprimento na execución do polígono industrial de Begonte, situado na parroquia de Carral. Segundo informou este luns en rolda de prensa a Deputada de Economía, Recadación e Facenda, Pilar García Porto, o Xulgado do Mercantil acaba de ditar unha sentencia notificada á Deputación o venres- na que desestima integramente a demanda de Gazeley e obriga á firma a pagar as costas do xuízo, co que non haberá ningún tipo de repercusión económica para a Deputación.
Gazeley comprou en 2008 unha parcela no parque empresarial de Begonte, onde construíu un centro de distribución de mercancías, que, posteriormente, arrendou a Centros Comerciais Carrefour S.A. Esta firma comercial estivo utilizando a mencionada nave ata o 28 de febreiro de 2012. Catro meses despois, como lles dicía, en xuño de 2012, Gazeley interpuxo unha demanda contra SUPLUSA na que lle esixía danos e perxuízos, alegando que o suposto incumprimento das obras do polígono lle provocara perdas económicas.
García Porto recalcou que a sentencia xudicial recén ditada é clara e moi contundente. A xuíza recolle tres argumentos fundamentais para tumbar a reclamación da empresa e negarlle o dereito a esixir tal indemnización:
PRIMEIRO.- O contrato de compra-venda da parcela do polígono de Begonte asinado en 2008 por Gazeley e SUPLUSA recolle unha cláusula na que, especificamente, a empresa renuncia a indemnización no caso de que se incumpra o prazo de execución das obras, un prazo que, en todo caso, se incluía no contrato só con mero carácter referencial e co obxectivo de facilitar as xestións de Gazeley con Carrefour.
SEGUNDO.- Na escritura de compra-venda da parcela asinada por Gazeley e SUPLUSA en 2009 recóllese, literalmente, que a parte compradora Gazeley- coñece e acepta o estado no que se atopan as obras de urbanización do polígono, inconclusas, e a entidade vendedora SUPLUSA-, pola súa banda, comprométese a finalizalas totalmente e á súa costa, sen establecerse ningún prazo en concreto para facelo. É dicir, co consenso de Gazeley, na escritura non se fixa ningún prazo para rematar as obras do polígono.
E TERCEIRO.- A xuíza estima probada a vontade de SUPLUSA de cumprir a súa obriga de terminar as obras de urbanización do polígono e de dotalo de subministro eléctrico por dúas razóns:
Por un lado, está acreditado documentalmente que, dende o ano 2005 -é dicir, aínda antes de que SUPLUSA lle vendera a parcela a Gazeley-, houbo contactos e conversas entre a Sociedade Urbanística Provincial e a compañía eléctrica BEGASA para dotar ó polígono de subministro eléctrico.
E, por outro lado, BEGASA confirmou tal extremo e deu fe no xuízo de que se estivo negociando o convenio de colaboración entre SUPLUSA e BEGASA co fin de encontrar a mellor solución dende o punto de vista técnico e económico; que o tempo de negociación foi normal, e que a solución máis viable finalmente foi unha liña de media tensión.
Pero non só iso, explicou Pilar García, ademais de non apreciar desidia, nin deixadez por parte de SUPLUSA, a xuíza recoñece que a entidade provincial lle deu facilidades a Gazeley, permitíndolle que, antes da venda da parcela, puidese adiantar traballos de construción do seu centro de distribución de mercadorías, co que puido acabalo e entregalo a tempo en arrendamento a Carrefour.
É o momento de que o PP pida desculpas públicas
A Deputada recalcou que o proceso xudicial de Gazeley demostra, unha vez máis, que a Deputación de Lugo xestiona ben, e que sabe facer valer esta xestión e os seus dereitos ante intereses espurios ou especulativos. E faino, a pesar do PP. E digo, a pesar do PP porque, lonxe de manter unha actitude prudente, ó Partido Popular, coma sempre, faltoulle tempo para manipular e acender o ventilador das insidias aproveitando a demanda de Gazeley. Unha vez máis pasáronse de freada, púidolles a ilusión... Agora, é o momento de que rectifiquen e pidan desculpas públicas.
Neste senso, García Porto indicou que, fronte á seriedade e eficacia deste Goberno provincial, o PP púxose do lado doutros intereses, como xa nos ten acostumados: mira cara outro lado nas participacións preferentes; na reclamación das especialidades de Radioterapia, Hemodinámica e Medicina Nuclear no HULA; nos servizos sociais; no Plan de Obras e Servizos... e mentres, en cambio, perdoa ós defraudadores con unha amnistía fiscal. Nunca están co importante, nin coas necesidades dos veciños.
A raíz da demanda de Gazeley, o Partido Popular acusou ó Goberno provincial de sectario, partidista, mentiroso, incumpridor, de dar mala imaxe... O fallo xudicial que se vén de producir, e, sobre todo, a contundencia dos argumentos recollidos na sentencia, non deixan lugar a dúbidas de que as acusacións do PP se caen por si mesmas. Por iso, esiximos ó Partido Popular que se desculpe publicamente polas súas mentiras e ataques inxustificados e, recomendámoslle, para futuras ocasións, que faga uso da virtude da prudencia, aseverou a Deputada.