A Deputación cumpriu nun 97% os investimentos en obras e servizos contemplados no Orzamento de 2012
A Deputación de Lugo cumpriu nun 97% os investimentos contemplados no Orzamento de 2012 para obras e servizos, segundo se pode comprobar nos informes oficiais do servizo de Intervención do organismo lugués. Deste xeito, a Deputada de Economía e Facenda, Pilar García Porto, cualificou este xoves de nova metedura de pata monumental as declaracións do Partido Popular nas que, utilizando datos sesgados e manipulados, criticou o nivel de execución orzamentaria do pasado exercicio.
Non é ignorancia a actitude coa que está a actuar día tras día o grupo provincial do PP, é de mala fe, subliñou García Porto, pois dunha análise seria e rigorosa dos datos ofrecidos na comisión informativa sobre a conta xeral do Orzamento da Deputación conclúese que os investimentos que fixemos en 2012 para a dotación e mellora de servizos e infraestruturas en tódolos Concellos da provincia ascenderon a 62,2 millóns de euros, cumprindo deste xeito coa aplicación do orzamentado nun 97%. Entre as inversións levadas cabo, a Deputada destacou iniciativas vitais para o desenvolvemento económico da provincia, en especial do noso rural, como o Plan de Comunidades Veciñais ou o Plan de Obras e Servizos, ó que, por certo, o Goberno de Rajoy deixou sen un euro e agora temos que soster Deputación e Concellos.
Pilar García lembrou así mesmo que o lugués está á cabeza dos organismos provinciais de Galicia en canto a execución orzamentaria, sendo ademais o que menos débeda financeira ten da comunidade autónoma e a quinta de toda España, segundo datos oficiais do Ministerio de Facenda. Xa lle gustaría á Xunta ter estes bos resultados económicos, afirmou.
Están rabiosos porque non gobernan na Deputación, sinalou a delegada de Economía, quen recordou que este Goberno provincial está a saldar, unha a unha, todas as débedas históricas que os populares deixaron cos lucenses, como fixemos estes mesmo martes no Pleno liquidando a débeda do canon hidroeléctrico de Chantada.
Incapaces de pedir desculpas polo caso Gazeley
Coas súas críticas á execución orzamentaria, engadiu Porto, o PP demostra unha vez máis a súa total incompetencia e irresponsabilidade, tal e como fixo no proceso xudicial da multinacional Gazeley contra a Deputación. O Partido Popular, nun alarde de imprudencia e oportunismo, púxose do lado da empresa e dedicouse dende o primeiro momento a lanzar insidias contra o Goberno provincial, en vez de defender os intereses dos veciños de Lugo. Gañamos o proceso, ata en dúas ocasións, e non foron capaces de pedir desculpas públicas polas súas mentiras e ataques inxustificados. Seguimos esperando, asegurou a Deputada.
Outras mostras recentes da ineptitude dos populares, engadiu, foron as súas críticas a obras financiadas pola Deputación, como a piscina de Sarria: nin sequera se decataron de que a execución dos traballos de construción desta infraestrutura é responsabilidade do Concello; ou o acondicionamento dunha estrada en Portomarín, a de Alto do Valiño a Valdeporrás, xa que, en contra do que dicía o PP, estas actuacións están executadas, recibidas e certificadas.
O PP non traballa
García Porto asegurou así mesmo que o Partido Popular non traballa, incumprindo coa labor seria de fiscalización que ten encomendada como oposición e pola que están cobrando máis de 150.000 euros ó ano 5 dos seus deputados. O PP dedícase a plaxiar as nosas propostas de Goberno. Copiaron aquela na que pediamos o mantemento das áreas sanitarias da provincia, e no Pleno deste mesmo martes levaron unha proposta calcada a unha resolución da Xunta de Goberno na que se aprobaba a posta en marcha dun plan de emprego xuvenil, aseverou.
