A Deputación organiza unha xornada informativa gratuíta sobre os retos do sector do vacún de carne na provincia
![Imaxe deputación de lugo](/sites/deputacionlugo.org/files/default_images/depulugo001.jpg)
A Deputación de Lugo organiza na Granxa Gayoso Castro, o vindeiro día 13 de setembro, Retos do sector do vacún de carne na provincia de Lugo, xornada formativa gratuíta na que se abordarán os retos que ten ante sí o sector na provincia. Profesionais coma Román Santalla, Secretario de Gandeiría da UPA; José Ramón González Rodríguez, gandeiro e enxeñeiro técnico agrícola; Benigno Fernández Fano, veterinario e membro da xerencia do Banco de Terras de Asturias; David Erice, enxeñeiro agrónomo, ou José Ángel Burgo Rodil, Subdirector Xeral de Produción Agropecuaria, abordarán temas de actualidade coma a proposta de reforma da Política Agraria Común (PAC) e a repercusión que esta pode ter na Comunidade, con especial atención ós seus efectos directos en Lugo, ou a relación entre a gandeiría de vacún de carne coa xestión do territorio ou o cambio climático na provincia.
Todos os interesados poden inscribirse de xeito totalmente gratuíto a partires do día 10 de setembro entrando na páxina web www.deputacionlugo.org. A xornada arrincará ás 10:30 e prolongarase ata as 15:00 horas, momento no que os participantes poderán coñecer de primeira man as instalacións do 1º Centro de Recría de gando vacún público de España, que está a construír o organismo provincial na Granxa Gayoso Castro, durante a visita coa que se pechará a xornada.
Máis do 50% do vacún de carne é lucense
A institución luguesa impulsa esta xornada dentro das actividades previstas no proxecto Lug02, o programa medioambiental financiado nun 80% pola Unión Europea, coma mostra do compromiso que a Deputación mantén cos gandeiros e agricultores lucenses, nun momento especialmente difícil para o sector, motor económico da provincia. De feito, xera uns 30.000 postos de traballo, directos e indirectos, o que representa o 30% da poboación en activo.
Lugo xoga un máis que destacado papel na Comunidade en canto á cría de gando vacún de carne, aportando máis do 50% das reses de Galicia. De feito, segundo datos da Consellería de Medio Rural, no 2012 a provincia contaba con máis de 116.000 cabezas de gando rexistradas, do total de 217.000 destinadas á produción cárnica en todo o territorio galego. Hai que ter en conta, ademais, que moita desta produción goza dun gran recoñecemento, que outorga, por exemplo, o selo de calidade diferenciada Ternera Gallega.
Apostando polo sector
Estas xornadas organizadas ó abeiro do programa Lug02 o pasado mes de marzo celebrouse unha similar enfocada ó sector da produción de leite-, son só unha mostra das moitas actividades organizadas polos responsables provinciais, comprometidos co traballo en prol do rural lucense xa que este ofrece un enorme potencial coma xerador de riqueza e emprego, así coma un efectivo elemento de loita contra o despoboamento e a degradación medioambiental.
De feito, a Deputación continúa adiante coa creación do que será o primeiro centro de recría público en España, levando xa executados 6 millóns de euros no proxecto e achegando 2,5 millóns máis nos Orzamento de 2013. Este centro suporá un enorme salto de calidade para os gandeiros, posto que lles permitirá aforrar custes, recriar máis e mellor, e posiblitará a xeración dun volume de negocio de 3 millóns de euros ó ano.
Outra das apostas máis firmes é o plan de emprego Fórmate en Verde, centrado no apoio e revitalización do agro. Este plan ofrece formación e asesoramento técnico especializado, de xeito totalmente gratuíto, a milleiros de persoas para crear empresas vencelladas á gandeiría e agricultura ecolóxicas e a xestión forestal sostible.