Gracia Querejeta, a directora preseleccionada para representar a España nos Oscar, estará mañá na Deputación de Lugo nun encontro aberto e gratuíto
![](/sites/deputacionlugo.org/files/Imagenes/0_8694_1.jpg)
A director de cine Gracia Querejeta, preseleccionada para representar a España no Oscar por 15 años y un día, estará mañá, luns 16 de setembro, na Deputación de Lugo, con motivo da inauguración do novo curso académico da Escola de Imaxe e Son do organismo provincial, o único centro público en Lugo que imparte ensinanzas superiores no eido audiovisual. Será nun encontro aberto e gratuíto ó público, que terá lugar, ás 17:00 horas, no Salón de Actos do Pazo de San Marcos. Previamente, ás 16:45 horas, Gracia Querejeta atenderá a todos os medios de comunicación interesados. O punto de encontro é diante do Salón de Plenos da institución luguesa.
Gracia Querejeta, filla do produtor Elías Querejeta e membro dunha xeración de xoves directoras de recoñecido prestixio, como Icíar Bollaín, Isabel Coixet ou Patricia Ferreira, expoñerá ós alumnos a súa experiencia dentro do mundo do cine e atenderá todas as cuestións que lle formule o público presente.
O curso 2013-2014 comeza coas 44 prazas dos Ciclos Superiores de Realización e Produción da EIS cubertas. Este é o sexto ano consecutivo que a Escola da Fundación TIC, organismo dependente da Deputación de Lugo, completa a matriculación, e con lista de espera no apartado de Realización. Ademais, a matrícula volveu ser de balde, agás para os repetidores, grazas ó esforzo económico da Fundación, co obxectivo de facilitar o acceso a un ensino gratuíto de calidade.
Querejeta: 6 películas en 15 anos
Gracia Querejeta é a continuadora dunha saga de cineastas que comezou o seu pai, o produtor Elías Querejeta, que lle abriu o camiño no mundo do cine e produciu varias das súas películas. A súa primeira experiencia profesional detrás dunha cámara foi como auxiliar de dirección en Dulces horas, en 1981, ás ordes de Carlos Saura. En 1988 dirixiu a curta Tres en la marca coa que obtivo o premio Teatro Arriaga de Bilbao. En 1990 realizou, xunto a Jesús Ruiz e Nacho Pérez de la Paz, El Viaje del agua, premio Goya ó mellor documental español.
En 1992 dirixíu a súa primeira película en solitario, Una estación de paso, premio especial do xurado na semana de cine de Valladolid. Despois seguíronlle El último viaje de Robert Rylands e Cuando vuelvas a mi lado. En 2004 dirixiu Héctor, galardoada co premio á mellor película no Festival de Málaga do Cine Español e en 2007, Siete mesas de billar francés, con varias candidaturas ós Goya, entre elas á mellor dirección. En 2008 recibiu o premio Ciudad de Cuenca do Festival Internacional de cine Mulleres en Dirección en recoñecemento á súa traxectoria. Ademais realizou outros traballos, como os documentais Primarias ou El trabajo de rodar. O seu último traballo é 15 años y un día co que volveu gañar a Biznaga de Ouro á mellor película no Festival de Cine Español de Málaga e unha das catro longametraxes preseleccionadas para optar a representar a España no Oscar.