A declaración internacional da Semana Santa de Viveiro xa se nota
O Presidente da Deputación, José Ramón Gómez Besteiro, a Alcaldesa de Viveiro, María Loureiro, e o Presidente da Xunta de Confrarías viveirense, José Veiga, deron conta este martes dos resultados da Semana Santa deste municipio mariñano, que demostran que xa se nota a declaración internacional deste festexo.
Fixéronse 400 enquisas nos hoteis, na rúa e na oficina de turismo, constatando que acudiron á Semana Santa de Viveiro cidadáns de todos os puntos de España, ata de Andalucía, así como do estranxeiro. Os principais turistas nacionais chegaron de Galicia, Madrid, Castela e León, País Vasco e Asturias. Os internacionais de Francia, Argentina, Irlanda e Italia. Todos coincidiron en que esta foi a mellor Semana Santa da historia de Viveiro.
María Loureiro salientou que este recoñecemento xa se traduciu en turistas e investimentos en Viveiro no 2013, cando houbo 3.664 turistas. Este ano, a cifra incrementou ata os 4.201. A diferencia doutros anos, o turista quixo fixar a súa estancia e tempo en Viveiro, especialmente nas procesións. A Alcaldesa remarcou que a Semana Santa viveirense é a cuarta mellora valorada de España, segundo unha enquisa do diario 20minutos.es.
O Presidente da Xunta de Confrarías destacou que estes resultados non se levarían a cabo sen a colaboración da Deputación máis o Concello de Viveiro, sen os cales sería imposible seguir ampliando os pasos, imaxinería, etc.
A Deputación de Lugo colaborou co Concello de Viveiro e a Xunta de Confrarías para que a Semana Santa viveirense, que é de Interese Turístico Nacional dende o ano 1988, recibise esta distinción a nivel internacional no 2013. Tamén colaborou economicamente, achegando 90.000 euros nos últimos tres anos, dos que 27.000 euros corresponde á anualidade deste ano. O noso compromiso será maior para o 2015, adiantou Gómez Besteiro. Así mesmo, a través da Fundación TIC elaborou varios traballos audiovisuais, promocionando a Semana Santa viveirense en destacadas citas como FITUR.
A Semana Santa de Viveiro recibiu un forte impulso na última década grazas ó traballo que o Concello de Viveiro desenvolveu conxuntamente coas confrarías. Melchor Roel foi unha figura clave, posto que foi capaz de unificar o esforzo dos máis de 3.000 confrades, -máis do 20% da poboación total de Viveiro-, mediante o impulso á Xunta de Confrarías. Este colectivo representa ás 8 confrarías viveirenses: Venerable Orden Tercera; Del Rosario, Santísimo Cristo de la Piedad; Hermandad del Prendimiento; de las Siete Palabras; de la Santa Cruz; Nazarenos dos de Fóra; e Misericordia. A instancias de Roel, teñen a súa disposición dende hai tres anos distintos locais municipais de ensaio, reunión e almacenaxe.
