A Deputación salda unha nova débeda histórica da provincia recuperando para Lugo a colección de Álvaro Gil
A Deputación de Lugo saldou unha débeda histórica máis da provincia ó recuperar a colección de ourivaría de Álvaro Gil para o Museo Provincial, conseguindo que pase a ser para sempre patrimonio de todos os lucenses. Así o destacou o Presidente, José Ramón Gómez Besteiro, que ofreceu este xoves en San Marcos unha rolda de prensa acompañado do delegado da área de Cultura, Mario Outeiro, e o secretario do organismo lugués, José Mourelle Cillero, para informar dos detalles do acordo acadado cos herdeiros de Álvaro Gil.
Segundo explicou Besteiro, hoxe mesmo presentou á Xunta de Voceiros o acordo, que será sometido a votación no Pleno do vindeiro martes. A Xunta de Goberno dará luz verde a vindeira semana ás prescricións técnicas e de cláusulas administrativas que rexerán o contrato de compra venda que asinarán a Deputación e os herdeiros do mecenas. O Presidente adiantou que as 40 pezas de ourivaría estarán de novo expostas no Museo Provincial entre finais de agosto e principios de setembro.
Desbloqueamos a transferencia dos hospitais, pagamos a 16 Concellos 11 millóns de euros do canon hidroeléctrico, puxemos en marcha os parques de bombeiros, construímos a sede da UNED de Lugo e recuperamos o Pazo de Tor. Agora resolvemos esta última débeda que deixou o Partido Popular cun acordo, que supón a volta á casa do legado de Álvaro Gil, subliñou Gómez Besteiro, engadindo que este é un éxito de todo o equipo de goberno, das dúas forzas políticas que o conforman, PSOE e BNG, que actuamos con prudencia, seriedade e responsabilidade. Neste senso, agradeceu o traballo desenvolvido polo equipo da Secretaría e de todos os funcionarios da Deputación para resolver unha situación para a que a institución luguesa fixo unha oferta seria, rigorosa, pública e única.
Máis beneficioso para a Deputación e os lucenses
A Deputación comprará por 2.346.200 euros as 40 pezas de ourivaría do legado de Álvaro Gil, ó que se suman 600.000 euros de costas xudiciais, co que o importe total é de 2.964.000 euros. O Presidente explicou que o acordo asinado é máis beneficioso para os intereses xerais da Deputación e de todos os lucenses que o plantexado anteriormente por dúas cuestións fundamentais:
- Por un lado, os herdeiros renuncian, dende o momento da firma do contrato de compra venda, a reclamar danos e prexuízos a través de calquera acción, administrativa ou civil, ademais de desistir da que xa teñen iniciada en maio deste ano ante a Deputación e que ascende a 2,7 millóns de euros.
- Por outra banda, o organismo provincial efectuará o pago en cinco anualidades (de 2014 a 2018), adquirindo a propiedade por lotes, pero a familia comprométese a entregarlle todas as pezas en depósito tras a sinatura do contrato.
O Presidente desvelou así mesmo que o acordo cos herdeiros de Álvaro Gil estaba listo para presentalo no anterior Pleno provincial, pero foi unha decisión política aprazar o anuncio ata despois das europeas para non interferir na campaña electoral, unha característica deste goberno e das dúas forzas que o compoñen da que outros deberían aprender.
En cinco anualidades
Pola súa banda, Mario Outeiro agradeceu o apoio prestado pola Presidencia da Deputación e o equipo de Secretaría e Intervención para alcanzar o acordo cos herdeiros de Álvaro Gil. Incidiu así mesmo na total discreción e transparencia de cara á oposición e á sociedade coa que se desenvolveron as negociacións, que desembocaron nun acordo de goberno para a recuperación dun destacado tesouro do patrimonio material galego.
Outeiro indicou que a Deputación efectuará o pago en 5 anualidades, entre este 2014 e o 2018, coa seguinte distribución: ano 2014, 6.000 euros por 5 pezas; ano 2015, 568.500 euros por 10 pezas; ano 2016, 568.600 euros por 6 obras; ano 2017, 583.000 euros por 15 pezas; e ano 2018, 584.100 euros, por 4 pezas.