O prestixioso cardiólogo Carlos González Juanatey analizará O corazón dos lucenses na Deputación de Lugo
O prestixioso cardiólogo Carlos González Juanatey someterá a análise na Deputación de Lugo O corazón dos lucenses. Farao na charla-coloquio que se celebrará mañá xoves no Salón de Actos do Pazo de San Marcos a partires das 20:00 horas, na que o actual Xefe do Servizo de Cardioloxía do Hospital Unversitaria Lucus Augusti-HULA, analizará diferentes aspectos relativos ao infarto de miocardio. A asistencia ao acto é totalmente gratuíta e libre ata completar o aforo do recinto.
Entre outros aspectos, Juanatey explicará polo miúdo en que consiste exactamente o infarto; consellos para previr esta doenza; ou cales deben ser as pautas e a trascedencia do tratamento para minimizar as súas consecuencias.
Carlos González Juanatey é doutor en Cardioloxía, e presta servizos no hospital lucense dende o ano 1998. De sobrado prestixio, exerce como Xefe do Servizo de Cardioloxía no HULA dende o ano 2008 e é autor, ademais, de numerosas publicacións internacionais e traballos científicos. Hai que destacar que a el deben os lucenses o impulso dos servizos de hemodinámica na provincia, tendo en conta que así o xustificaban as cifras de cateterismos realizados anualmente en Lugo.
Para aqueles que non poidan acceder ao Salón para seguir en vivo a conferencia do doutor Juanatey, así como o coloquio que se celebrará a continuación, poderán facelo en tempo real a través da rede, xa que o acto será retransmitido en streaming grazas ao traballo da Fundación TIC.
