A Deputación esixe á Xunta que dote de funcións ao Padroado de Sargadelos e que o convoque polo menos unha vez ao ano
A Vicepresidenta Segunda da Deputación de Lugo, Lara Méndez, esixiu este martes á Xunta de Galicia que dote ao Padroado de Sargadelos de funcións reais, e que o convoque cando menos unha vez ao ano para que cumpra cos fins para os que foi creado e que ten atribuídos por Lei. Méndez fixo estas propostas durante a reunión que o órgano mantivo esta mañá tendo en conta que, se ben están representados a adminitración galega, o organismo provincial e o Concello de Cervo, é a Xunta a que ten a responsabilidade sobre o seu funcionamento.
Segundo o artigo 3º do Decreto 17/1987, do 22 de xaneiro, polo que se reestrutura e se determinan as funcións do Padroado do conxunto histórico artístico de Sargadelos, as súas atribucións son as seguintes: continuar co labor de recuperación e conservación do conxunto histórico artístico de Sargadelos; fomentar os estudos sargadelinos no centro cultural antes citado; e vixiar que o nome de Sargadelos non sexa utilizado para fins inadecuados ao seu espírito e significación. Ningún destes obxectivos se está a cumprir a día de hoxe porque o Padroado está totalmente paralizado, destacou a Vicepresidenta.
Nos últimos 8 anos, o órgano soamente se reuniu en tres ocasións, dúas delas para cuestións de mero trámite, explicou Lara Méndez, relacionadas co mantemento da Casa da Administración, e unha, a única en todo este tempo que tivo verdadeiro contido, foi solicitada pola propia Deputación para abordar o futuro da fábrica de cerámica. Neste encontro, celebrado en decembro do 2013, chegouse a un acordo a tres bandas no que se instaba á Xunta, á Deputación e ao Concello de Cervo a impulsar iniciativas e ferramentas ao seu alcance para, en colaboración coa empresa e os traballadores, procurara a viabilidade da Cerámica de Sargadelos no municipio mariñano. Sen embargo, de novo polo deixamento do Goberno de Feijóo non se materializou nin avanzou nada ao respecto, asegurou a Vicepresidenta.
Esta inactividade demostra unha vez máis a total desidia e falta de compromiso do Goberno galego coa provincia e o seu patrimonio cultural, subliñou Méndez.