Deputación de Lugo

O Goberno da Deputación promociona a figura de Avelino Díaz co Nadal Cultural 2017 de Meira

- Trátase da programación gratuíta de actividades culturais que organiza a Asociación Avelino Díaz, para promocionar e difundir a figura do escritor meirego- García Porto destacou que “contribuímos á difusión da figura deste autor, tanto pola altísima calidade da súa obra como polo que representa a súa traxectoria vital”- A Deputación colabora coa difusión destas xornadas, que terán lugar 22 e 23 de decembro, e a través da TIC que gravou o primeiro documental sobre o poeta

A Deputada de Cultura, Pilar García Porto, e o Concello de Cultura de Meira, Agustín Méndez, presentaron este martes a programación do Nadal Cultural 2017 que organiza a Asociación Avelino Díaz e que leva o nome de 120 anos de Avelino Díaz. No acto, participaron membros de dita asociación, encargados da organización desta iniciativa que se desenvolverá os días 22 e 23 de decembro nos Concellos de Riotorto e Meira, respectivamente. O Goberno Provincial colaborou coa asociación a través da TIC, coa gravación do primeiro documental sobre o poeta de Meira nacido en Riotorto.

García Porto destacou que “a través desta iniciativa contribuímos á difusión da figura e escritor lucenses, tanto pola súa obra, que destaca pola altísima calidade; como pola súa traxectoria vital: un lucense emigrado ás América que sempre tivo morriña da súa terra e do seu idioma. Dende o Goberno da Deputación, e dentro da nosa aposta por impulsar a cultura e o idioma, continuaremos a pór en valor a figura deste autor lucense da literatura galega do século XX”.

Programación

Venres 22 de decembro

19.30 horas. Local da Órrea – A Terra de Miranda: Lacón Poético

Proxección do documental Riotorto emigrante: a voz dos retornados, de Vanesa Gómez Lourido e Miriam Bouso.

Presentación do libro de Avelino Díaz 14 poemas, por parte da poetisa mirandesa María José Fernández, con edición crítica e estudo previo de Benigno Fernández Salgado. Recital Poético.

Entrega á asociación de Veciños da Órrea do cadro A Órrea dende a Eirexa, por parte do pintor mirandés Antonio Rivas Pol.

Actuación do Coro de Riotorto.

Sábado, 23 de decembro

17:00 horas. Centro Sociocultural de Meira.

Conferencia: Avelino, un periodista de raza; a cargo de Xosé López García, catedrático de xornalismo da USC e Secretario do Consello da Cultura Galego

Presentación do libro de Avelino Díaz 14 poemas, con edición crítica e estudo previo de Benigno Fernández Salgado.

Conferencia: A voz nobre e conmovida de Avelino Díaz na poesía galega transterrada de Buenos Aires (1930-1970), a cargo de Xesús Alonso Montero, ex-Presidente da Real Academia Galega.

Intervención do Presidente da Asociación Cultural Avelino Díaz, Paco Veiga.

Actuación do Tango en Xaneiro.

20:00 horas. Centro Sociocultural de Meira.

Musiqueando a Avelino, con actuación de Nove Ferreñas Pandereitas e outros grupos.

De Lugo a Arxentina

Díaz naceu en Riotorto, no lugar da Travesa, na parroquia de Santa Comba da Órrea, onde viviu ata os dez anos de idade. Aos 12 viuse na obriga de emigrar coa súa familia a Bos Aires, alí permaneceu seis anos ata regresar a Meira, onde exerceu coma mestre durante un ano para marchar de novo, e non regresar. Na capital arxentina, Avelino Díaz desenvolveu unha intensa actividade xornalística e literaria. Como legado, deixou publicadas tres obras: “Debezos” e “Pallergas”, en galego xunto a “Flor de Retama”, en castelán.

Últimas Novas