Deputación de Lugo

O Goberno da Deputación pon en valor a figura de Manuela Barreiro Pico, a primeira muller licenciada

- Trátase do monográfico editado polo Executivo Provincial e elaborado pola Catedrática e profesora de Química da USC, María Isabel Fernández, que recolle a vida e obra desta ribadense, a través de fotografías, recortes de prensa e documentos da época - García Bermúdez destacou que “Manuela Barreiro Pico foi unha pioneira na loita dos dereitos de todas as mulleres e en abrir camiño nos estudos universitarios, pois neses anos tivo que combater contra os convencionalismos, trabas e restricións da sociedade”- Esta farmacéutica foi a primeira muller en acadar o título de Bacharelato no instituto de Lugo, en 1896; a primeira matriculada na Universidade de Santiago de Compostela, en 1896; e a primeira licenciada en Farmacia en Galicia e sétima de España, no ano 1900

As Deputadas Mayra García Bermúdez, Sonsoles López Izquierdo e Pilar García Porto, e a Concelleira de Economía, Ana Prieto González, xunto á profesora María Isabel Fernández García, presentaron este martes, no obradoiro do libro do Centro de Artesanía e Deseño, Manuela Barreiro Pico. Ribadense destacada, primeira licenciada en Farmacia de Galicia (1900). Trátase do libro editado polo Executivo Provincial a través do Servizo de Publicacións, que recolle a vida e obra desta lucense a través de fotografías, recortes de prensa e documentos. Manuela Barreiro Pico foi a primeira muller en acadar o título de Bacharelato no instituto de Lugo, en 1896; a primeira matriculada na Universidade de Santiago de Compostela, en 1896; e a primeira licenciada en Farmacia en Galicia e sétima de España, no ano 1900.

García Bermúdez destacou que “Manuela Barreiro Pico foi unha pioneira na loita dos dereitos de todas as mulleres e en abrir camiño nos estudos universitarios, que hoxe en día cursan multitude de mulleres, pero que na sociedade que lle tocou vivir tivo que combater contra os convencionalismos, trabas e restricións da época. É un orgullo para todos os veciños da provincia, e sobre todo para a Comarca da Mariña, que esta ribadense, fora a primeira muller en estudar na Universidade de Santiago de Compostela e se introducira na actividade profesional a través da farmacia”.

A Deputada de Recadación e Facenda agradeceu o importante labor e o traballo monográfico da profesora María Isabel Fernández “xa que esta obra, axúdanos a poñer en valor e recuperar do esquecemento a figura desta muller valente, emprendedora e sen complexos”.

Ribadense destacada

Manuela Antonia Barreiro Pico naceu en Viveiro o 5 de xullo de 1887, aínda que a súa vida transcorreu no Concello de Ribadeo, onde o seu pai era mestre. Estudou ensinanza primaria na escola de nenas de dita cidade e preparou o Bacharelato no colexio de S. Luis. Esta ribadense foi a primeira muller en acadar o título de Bacharelato no instituto de Lugo, en 1896; a primeira muller matriculada na Universidade de Santiago de Compostela, en 1896; e a primeira licenciada en Farmacia en Galicia e sétima de España, no ano 1900. Para realizar os estudos universitarios tivo que solicitar numerosos permisos mentres que os homes o podían facer sen ningún tipo de problema. Abriu a súa farmacia en Ribadeo no ano 1901, co nome Farmacia Moderna, sendo noticia en numerosos diarios de prensa galegos. Traspasaría a súa farmacia en 1931, despois de 30 anos de profesión. Morreu en Madrid o 29 de xaneiro de 1953.

Últimas Novas