A Vicepresidenta Segunda da Deputación pecha as festas do San Froilán en Barcelona ás que asistiron 60.000 persoas
A Vicepresidenta Segunda da Deputación, Lara Méndez, participou este domingo nos últimos actos do San Froilán en Barcelona. Os festexos, iniciados o pasado venres, concluíron cunha Misa e unha procesión na honra do patrón de Lugo. Segundo os cálculos da Garda Urbana barcelonesa e dos membros da Asociación de Amigos do San Froilán, durante estes tres días unhas 60.000 persoas celebraron as festas luguesas. Logo da intensa xornada de onte, na que a responsable da Área de Promoción Económica e Emprego da Deputación estivo acompañada, entre outras autoridades, do Alcalde de Barcelona, Jordi Hereu, da rexedora de Nou Barris, Carmen Andrés, e do Presidente da Peña Deportivista, Germán Martínez, a Vicepresidenta Segunda destacou a intensidade coa que os galegos afincados en Cataluña celebran os festexos, que xa son os máis importantes da Cidade Condal despois das tradicionais festas da Merced. A praza Maior do distrito de Nou Barris fíxose pequena para recibir ós miles de lugueses e galegos que neste día participaron da Misa e na posterior procesión. As distintas autoridades seguiron desde primeira fila os actos relixiosos que estiveron amenizados pola Coral Irmandade a Nosa Galiza de Mollet e a Banda de Gaitas Toxos e Xestas. A continuación, a sesión vermut correu a cargo da actuación dunha orquestra galega. En declaracións ós xornalistas barceloneses, Lara Méndez subraiou que foi unha experiencia moi positiva que une e estreita lazos entre Galicia-Cataluña e Cataluña-Galicia. Neste senso, quero recoñecer o labor que están facendo os nosos emigrantes por manter as tradicións. Sen dúbida, Lugo existe e queda demostrado que a nosa provincia ten un potencial moi importante. Así o sinten os lugueses e galegos residentes en Nou Barris. Non hai máis que ver a importancia que lle dan a estes festexos. Para eles son as festas máis importantes despois das da Merced. Desde a Deputación de Lugo xa anunciamos que seguiremos nesta liña con Cataluña e con outras comunidades. Desde onte, Lara Méndez puido comprobar o sentimento e o fervor co que os galegos emigrantes celebran as patronais máis importantes de Galicia. Este ano os festexos voltaron a seu un éxito grazas ó traballo levado a cabo pola Asociación de Amigos do San Froilán, que desde 1994 mantén viva esta tradición. O distrito de Nou Barris é un dos tres máis poboados de Barcelona. Isto débese, en boa parte, ós miles de emigrantes galegos que desde hai anos fixaron a súa residencia nesta localidade. En concreto, conta con 180.000 habitantes e moitos deles son da provincia de Lugo.
