Máis de medio cento de rapaces de Guitiriz e de Pontevedra coñecen esta semana a Reserva Terras do Miño
52 rapaces de Guitiriz e de Pontevedra coñecerán esta semana a Reserva da Biosfera Terras do Miño. Esta martes 25 alumnos do obradoiro de emprego do municipio da Terra Chá percorreron o Centro de Interpretación do río Rato para coñecer o contorno deste espazo natural. Os rapaces participaron nunha visita guiada, na que técnicos do Instituto Lucense de Desenvolvemento Económico e Social (INLUDES) amosaron ós participantes a calidade ambiental e a riqueza natural do espazo natural, así como a variedade florística, representada polos bosques da ribeira, árbores centenarias, prantas acuáticas, etc. O xoves, 27 de maio, 27 estudantes do CEIP de Tomiño (Pontevedra) tamén terán a ocasión de comprobar a riqueza medioambiental da zona, participando en actividades semellantes as realizadas polo rapaces de Guitiriz. Con estas visitas, a Deputación promove o coñecemento e a interpretación do medio natural, cultural e etnográfico de Terras do Miño incluído na Rede Mundial de Reservas da Biosfera en 2002. A través desta iniciativa os escolares teñen a oportunidade de descubrir este espazo natural que conta cunha superficie de 363.669 hectáreas. Terras do Miño foi a primeira Reserva da Biosfera declarada en Galicia e unha das máis extensas de España. Abarca o 39% do territorio de toda a provincia e inclúe 26 Concellos: Ourol, O Valadouro, Muras, Alfoz, Mondoñedo, Abadín, Xermade, Vilalba, A Pastoriza, Riotorto, Guitiriz, Cospeito, Meira, Begonte, Rábade, Castro de Rei, Outeiro de Rei, Pol, Lugo, Friol, Castroverde, Guntín, O Corgo, Baralla, O Páramo e Láncara.
