A Deputación arranxa outra ponte en Baleira que 'o Partido Popular, co apoio do Alcalde, construíu con tubos de chapa'
O Deputado de Xestión Territorial, Manuel Martínez, supervisou este luns as obras de reconstrución dunha ponte no núcleo de Córneas, en Baleira, que o Partido Popular, estando á fronte da Deputación, e que Francisco Acal, sendo Deputado, decidiu construír con tubos de chapas. Martínez salientou que as chapuzas do PP, apoiadas polo Alcalde, fixeron que esta infraestrutura, situada na CP-0408, non soportase as choivas e se viñese abaixo.
O responsable do departamento provincial de Vías e Obras, xunto a técnicos provinciais, supervisou o estado no que se atopaba a ponte ó día seguinte do seu derribo. Púxose entón en marcha a redación dun completo proxecto de mellora, cuxo inicio estivo á espera dos permisos legais doutras administracións. Martínez subliñou que, obtida dita documentación imprescindible, iniciamos unhas actuacións ás que destinamos 30.000 euros, presuposto que o Partido Popular nos obriga a investir para que os veciños de Baleira poidan facer uso desta infraestrutura de xeito seguro, porque isto non volverá a suceder.
Para elo, a Deputación decidiu substituír os actuais tubos de chapa circulares, de tan só 1,5 metros de diámetro, material que o PP e o rexedor consideraron axeitado, poñendo en perigo ós usuarios e malgastando cartos, por 4 marcos de formigón rectangulares, de 3 metros de ancho por 2,8 metros de alto, ó longo dos 9,6 metros da ponte. O organismo provincial xa realizou as tarefas de escavación e colocou os marcos de formigón. Agora procederá a construír os muros de contención anexos á ponte e ó acondicionamento da estrada con dobre pavimentación. Aínda que o prazo máximo de execución establecido é de tres meses, Manuel Martínez subliñou que as obra poderán rematar moito antes. De feito, segundo os técnicos, en 15 estarán listas.
Dous casos: 100.000 euros
Martínez indicou que a ponte de Córneas non é un caso alleo. O Partido Popular, con Francisco Acal como Deputado, construíu en Cubilledo, tamén en Baleira, unha ponte con tubos fixados na terra, outra infraestrutura que se veu abaixo coas choivas, e que tamén tivemos que arranxar, investindo 70.000 euros para facer nunha ponte segura. Coas actuacións que estamos a executar agora, xa son 100.000 euros os cartos que dedicamos á reparación das chapuzas do PP só neste municipio. Todas elas, feitas co apoio e consentimento do propio Alcalde.