Besteiro esixe ó Goberno que 'defenda a quen realmente vive do campo' no reparto da futura PAC
![](/sites/deputacionlugo.org/files/Imagenes/0_8718_1.jpg)
O Presidente da Deputación de Lugo, José Ramón Gómez Besteiro, clausurou este venres a xornada sobre o vacún de carne, organizada na Granxa Gayoso Castro, na que os expertos participantes puxeron sobre a mesa temas de especial interese para este sector, coma as estratexias de futuro fronte á nova proposta de Política Agraria Común (PAC) ou a importancia da gandeiría de carne na xestión do territorio.
Na súa intervención, Gómez Besteiro, que estivo acompañado polo secretario xeral de Unións Agrarias (UU.AA.), Roberto García, instou á Xunta e ó Goberno central a defender a quen realmente vive do campo -60.000 galegos, dos que 30.000 son lucenses-, fronte os grandes propietarios, tendo en conta que a folla de ruta da nova PAC introduce o Pago Básico por Hectárea, o que deixará ós nosos gandeiros e agricultores en clara desvantaxe fronte ós grandes propietarios. Segundo os datos do último Censo Agrario publicado, a media de hectáreas por explotación en Galicia é de 7,05, fronte a outras rexións coma Andalucía, onde esta media se eleva ata as 46.
Xunta e Goberno deben dar respostas
Besteiro denunciou a falta de proxecto de país de Núñez Feijóo, que non está a facer nada para avogar polos nosos gandeiros e agricultores, e esíxelle que defenda en Madrid os intereses galegos, agora que non teñen a excusa de botar as culpas a Europa. O máximo responsable provincial engadiu que son estas dúas Administracións, Xunta e Goberno, as que teñen a obriga de despexar as incógnitas que presenta o futuro reparto das axudas. Logo de que a Unión Europea aprobara unha partida de 50.000 millóns de euros para España ata o 2020, agora é o Goberno central o que debe decidir sobre determinados aspectos pendentes que preocupan especialmente ós gandeiros coma que criterios aplicarán para o reparto dos 50.000 millóns que percibirá España ata o 2020; quen poderá recibir estas axudas: gandeiros e agricultores en produción ou calquera propietario de terras? Porque, por exemplo, a Duquesa de Alba é propietaria pero non é produtora, ou por que sendo España o segundo país que máis fondos recibe de Europa, seguimos sendo a Comunidade á que menos cartos chegan, só 175 millóns ó ano?
Compromiso co rural
Gómez Besteiro fixo un chamamento ó sentido común para que se actúe con xustiza e que se invista nos gandeiros e agricultores que realmente producen. O Presidente subliñou que dende que entramos no goberno provincial mantemos unha aposta firme e decidida polo campo, un dos piares fundamentais da nosa economía, capaz de xerar emprego e manter vivas as nosas aldeas a pesares da sangría demográfica. Neste sentido, lembrou algunha das iniciativas que está a poñer en marcha o organismo provincial, coma o 1º Centro público de Recría de España que a Deputación de Lugo constrúe, con 13 naves con capacidade para 3.000 novillas. Está previsto que a vindeira semana se aproben as obras da 2ª fase.
Outra das iniciativas ás que Gómez Besteiro fixo referencia foi Fórmate en Verde, plan de emprego para revitalizar o campo, crear emprego e fixar poboación no rural con formación e asesoramento técnico especializado, de xeito totalmente gratutíto, a 900 lucenses para que creen ou reconvirtan empresas vencelladas á agricultura e gandería ecolóxica, así como ó aproveitamento forestal sostible. Do mesmo xeito, lembrou liñas de axudas coma a de Axudas ó Medio Rural ou o Plan de Comunidades Vecinais, coas que se achegaron máis de 2.300.000 euros, só no pasado ano, a obras de mellora de accesos rurais e explotacións, acondicionamento de fontes e peches de pastizais; puntos de recollida de plásticos ou construción de curros para o gando.
As conferencias
A xornada xerou un grande interese entre o sector logrando reunir na Granxa Gayoso Castro a preto de 200 gandeiros, procedentes de toda a provincia, que puideron escoitar a expertos coma Román Santalla, Secretario de Gandeiría da UPA; José Ramón González Rodríguez, gandeiro e enxeñeiro técnico agrícola; Benigno Fernández Fano, veterinario e membro da xerencia do Banco de Terras de Asturias; David Erice, enxeñeiro agrónomo, que tomaron parte en mesas redondas e abertas á participación nas que se abordaron cuestións coma coma Proposta de reforma da PAC e repercusión para Galicia ou Gandería de vacún de carne, territorio e medio ambiente.