A Deputación impulsa o foro Reaviva o teu barrio, que analizará o papel do urbanismo coma motor de cambio e xerador de riqueza
A Deputación de Lugo impulsa a celebración da 1ª Xornada Reaviva o teu barrio, organizado polo lucense Gabinete de Urbanismo e Arquitectura GAU, que reunirá o vindeiro 26 de outubro en Lugo a destacados especialistas en urbanismo. Nesta xornada, financianciada pola institución provincial, analizaranse diferentes mecanismos de recuperación de espazos urbanos, empregando coma modelo a zona lucense do Agro do Rolo, así coma as novidades e aspectos máis destacados da nova Lei de Rehabilitación, Rexeneración e Renovación Urbana.
Os expertos porán sobre a mesa as súas experiencias persoais, en cuestións de actualidade coma os diferentes modelos de rehabilitación actuais, que buscan a implicación dos veciños, principais axentes interesados polo seu dobre papel de propietarios e usuarios. Do mesmo xeito, abordarán aspectos tan interesantes coma o feito de que as reordenacións e rehabilitacións integrais dos barrios inflúen na mellora das condicións de vida, contribuíndo a crear modelos de convivencia que potencian as relacións humanas e culturais e que incentivan a creación de emprego directo e indirecto e, polo tanto, de riqueza.
O exemplo da praza San Marcos
Un perfecto exemplo de coma as actuacións urbanísticas con capaces de cambiar os hábitos, mellorando a calidade de vida dos veciños, é a praza de San Marcos. A ampla reforma levada a cabo co Plan Urban, que fixo dela a 1ª praza wifi da cidade, trouxo consigo positivos efectos, coma a rehabilitación de edificios antigos ou a apertura de novos negocios, que fixeron que este espazo pasara de ser unha rúa de tránsito a un espazo de actividade para os lucenses: xentes de todas as idades conectadas á rede wifi gratuíta da Deputación de Lugo; lugar de xogos para os máis pequenos; integración coma escenario de celebración de actos festivos, etc.
