Novo premio da Unión Europa á xestión da Deputación de 600.000 euros para emprego na provincia
A Unión Europea premiou, unha vez máis, á Deputación de Lugo pola súa xestión de fondos europeos, concedéndolle un novo investimento de 600.000 euros, que a institución achega ó emprego, tal e como acordou este venres a Xunta de Goberno. Este orzamento procede do reparto de remanentes das axudas do Fondo Social Europeo. É o segundo recoñecemento comunitario ó organismo provincial nas últimas semanas. Este mesmo mes, a UE concedía á Deputación de Lugo 1,4 millóns de euros, neste caso co reparto de remanentes do Fondo Europeo de Desarrollo Regional (FEDER), e convertíaa na entidade local en Galicia que recibía o maior presuposto. O voceiro provincial socialista, Manuel Martínez, desvelou hoxe este novo premio da Unión Europea e remarcou que captamos 2 novos millóns de euros da Unión Europea para emprego e sumamos, deste xeito, un orzamento de 14 millóns de euros para plans de emprego na provincia. O Partido Popular debería traballar un pouco máis e non traer ó Pleno mocións para tapar o que non fai a Xunta.
Estes 14 millóns de euros distribúense do seguinte xeito:
1.- Este novo investimento de 2 millóns de euros da Unión Europea.
2.- Pacto Provincial polo Emprego con 7 millóns de euros. O organismo lugués rematou a primeira parte desta programación. Antes de finais de ano, porá en marcha a segunda. En total, contribúe á inserción laboral de 1.500 lucenses desempregados, nas profesións con máis futuro en Lugo.
3.- 1 millón de euros do Fórmate en Verde. Na actualidade, 900 lucenses están a recibir formación práctica en sectores estratéxicos como a gandeiría e agricultura ecolóxica, así como o sector forestal, para crear ou reconverter as súas propias empresas.
4.- Proxecto de Dinamización do Tecido Empresarial, 3 millóns de euros. É o plan que a Deputación arrancará xunto á Escola de Organización Industrial nos vindeiros meses, e co que creará 100 novos postos de traballo, ó tempo que impulsará un mínimo de 300 PEMES e autónomos da provincia. Con este programa, un cento de lucenses recibirán formación sobre novas tecnoloxías para, posteriormente, prestar asesoramento a entidades da provincia.
5.- Máis de 200 bolsas de emprego para mozos no paro con 900.000 euros. A institución mantén aberto o prazo de solicitude dunha convocatoria de becas, e xa acadou máis fondos para novas bolsas no 2014.
Obras Riotorto
A Xunta de Goberno aprobou a contratación das obras pendentes na estrada de Marco de Álvare ás Rodrigas, no Concello de Riotorto, por valor de 516.000 euros. Con este orzamento, xunto ás case 200 fincas expropiadas, a institución garante o remate destas actuacións. Martínez subliñou que este Goberno Provincial cumpre coa palabra dada ós veciños, a diferencia do que fai o Partido Popular, que prometeu realizar estas obras, cando non tiña cartos nin terreos, enmarcándoas no famoso plan dos 50 millóns de euros.
Martínez exisiu ó PP que pida desculpas ós cidadáns e a esta institución polas mentiras e calumnias que realizou ó respecto destas obras na CP 5501. O voceiro lembrou primeiro, enganou ós cidadáns prometendo estes traballos que nunca fixo. Logo, debido á paralización temporal destas actuacións polos problemas económicos da anterior adxudicataria que está en concurso de acredores, voltou a mentir ós veciños, asegurándolles que este Goberno Provincial non ía a facer estes traballos. E despois, calumniou a esta institución, dicindo que permitira un desfase nestas obras de 190.000 euros, empregando borradores técnicos que atopou nas papeleiras ou mesas da Deputación, cando a documentación oficial, procedente da liquidación destas actuacións, concluíu que existía un saldo a favor do organismo provincial de 37.000 euros. Queda desmontada, unha vez máis, a campaña de difamación e de panfletos do PP sobre estas obras en Riotorto.
Conservación
A sesión tamén acordou a contratación dos traballos de conservación de 3.200 quilómetros de estradas provinciais, que discorren por 51 Concellos, por valor de 2 millóns de euros. En vindeiras Xuntas de Goberno, unha vez que transcorran os prazos legais para a presentación de ofertas, a Deputación aprobará a adxudicación das tarefas de mantemento doutros 1.000 quilómetros de vías, de 16 municipios, para os que temos reservados uns 800.000 euros. O voceiro destacou que reforzamos a conservación da que é a rede viaria provincial máis extensa de España, con 4.200 quilómetros. Facemos un gran esforzo inversor mentres a Xunta, administración cun orzamento 100 veces superior ó da Deputación de Lugo, e responsable de 5.500 quilómetros de vías en Galicia, mantén bloqueado o proceso de transferencia de estradas dende 2009. Pola contra, acordou a transferencias de vías en Ourense e Pontevedra. Outro exemplo máis, da discriminación que sofren os lucenses por parte de Feijóo.
