A Deputación de Lugo non avalou, nin supervisou o proceso de funcionarización do Concello de Antas de Ulla
![Imaxe deputación de lugo](/sites/deputacionlugo.org/files/default_images/depulugo001.jpg)
O Deputado de Cooperación e Asistencia ós Concellos, Álvaro Santos, informou este xoves de que a Deputación de Lugo en ningún momento avalou, nin supervisou o proceso de funcionarización do Concello de Antas de Ulla aprobado pola corporación local no Pleno do pasado martes. De feito, non temos constancia algunha do plan que pretende seguir o Concello, nin dos postos de traballo ós que lles afecta, polo que mal podemos avalar ou supervisar, explicou.
O único que recibiu o organismo provincial, engadiu Santos, foron tres consultas xenéricas en materia de persoal que chegaron ó buzón xeral do departamento de Cooperación cos Concellos a través de correo electrónico. É máis, nunha desas respostas advertimos, literalmente, de que non é legalmente posible proceder á consolidación de emprego temporal en fixo, indicou o Deputado.
Álvaro Santos destacou así mesmo que a Deputación de Lugo colabora e presta asistencia técnica a todos os Concellos da provincia en procesos relacionados con recursos humanos, pero precisamente neste caso non recibimos nin sequera unha solicitude do Concello de Antas para facelo.