Aberta a solicitude dos descontos do 50% na matrícula do Campus de Lugo que ofrece a Deputación
![Imaxe deputación de lugo](/sites/deputacionlugo.org/files/default_images/depulugo001.jpg)
A Deputación ofrece dende hoxe e ata o mércores incluído, período da nova fase de preisncrición na USC, novos descontos do 50% nos custes da matrícula. Están dirixidos a estudantes que se incorporen a 7 graos do Campus de Lugo: Enxeñería en Procesos Químicos Industriais; Enxeñaría Civil; Enxeñaría en Xeomática e Topografía; Enxeñería Agrícola e Agroalimentaria; Enxeñaría Forestal e do Medio Natural; Lingua e Literatura Españolas; Ciencias da Cultura e Difusión Cultural. O desconto realízase de xeito automático no momento de pagar as correspondentes taxas universitarias.
O organismo provincial xa ofreceu estes descontos durante o prazo de preinscrición da USC en xullo, beneficiando a 145 estudantes. As bolsas para gastos de matrícula enmárcanse no Plan de Choque en impulso do Campus de Lugo, que ten en marcha Deputación e USC.
Deste xeito, continúan coa campaña #paraestudarlugo, que promociona a calidade de vida de Lugo, o Campus lucense como destino para os novos universitarios, ó ter unha das ofertas máis plurais de Galicia, e a matriculación en determinados graos. O microsite http://paraestudarlugo.com recolle as principais características que definen á cidade e ó Campus. Pódese atopar máis información en http://paraestudarlugo.com, nas contas de Twitter da USC (@UniversidadeUSC) e da Deputación de Lugo (@depulugo), así como na páxina de Facebook do organismo provincial, https://www.facebook.com/diputacionlugo.
500.000 euros
A Deputación inviste 500.000 euros no Plan de Choque que, xunto ás bolsas para gastos de matrícula e á campaña de difusión do Campus de Lugo, inclúe 13 medidas:
- Realización dun plan de promoción de Lugo como cidade universitaria e das titulacións do Campus de Lugo.
- Determinación dun plan de bolsas para gastos de matrícula nas titulacións con problemas de demanda.
- Plan de captación de estudantes doutras nacionalidades.
- Desenvolvemento dun plan de apoio para as prácticas de campo.
- Determinación dun plan de bolsas de investigación en grupos.
- Fomento das titulacións de Máster.
- Potenciación para a realización de cursos de verán na provincia de Lugo.
- Estudo sobre a posibilidade de utilizar a Granxa Gayoso Castro para a realización de prácticas universitarias.
- Impulso da docencia semipresencial ou a distancia mediante a implantación de novas tecnoloxías.
- Incentivos de Traballos de Fin de Grao e Traballos Fin de Máster.
- Impulso da divulgación científica e a captación de novos talentos.
- Estudo sobre a posibilidade de incrementar os fondos existentes na Biblioteca Intercentros do Campus de Lugo.
- Análise das infraestruturas deportivas e docentes.