A TIC promociona á Ulloa coa gravación da II Ruta Cabalar que se celebra este sábado
A Fundación TIC, dependente da Deputación de Lugo, gravará a II Ruta Cabalar que reunirá este sábado na comarca da Ulloa a uns 150 xinetes afeccionados de toda Galicia. A Deputada de Economía, Pilar García Porto, anunciou que un equipo de bolseiros e profesionais da Fundación estará a pé de ruta para gravar as mellores imaxes do paso dos participantes e os seus cabalos. Ao igual que se fixo na pasada edición, sinalou a Deputada con este material editarase un DVD e reportaxes para difundir a cita en redes sociais, foros especializados, blogs e na páxina web da Fundación.
García Porto fixo estas declaracións na presentación da cita, que tivo lugar este xoves na casa rural Parada das Bestas, en Palas de Rei, e na que tamén participou o organizador da ruta, Isaac Castro. A representante provincial destacou o gran labor cultural que fai o colectivo con estas actividades ecuestres pois ademais de promover a afección por este deporte, contribúen á promoción turística e económica da comarca, ao transcorrer a ruta por algunhas das paraxes máis fermosas dos municipios de Palas de Rei, Monterroso e Antas de Ulla. Ademais, hai que destacar o traballo que realizan membros da agrupación coa posta a punto da ruta, na limpeza e apertura de accesos de camiños e tramos nestas zonas polas que pasa o Camiño de Santiago, engadiu Porto.
Desenvolvemento da ruta
A II Ruta Cabalar da Ulloa, a única ecuestre en Galicia que pasa por tres concellos, partirá nesta ocasión ás 15:30 horas do complexo hostaleiro A Cabaña, en Palas de Rei, e continuará por un tramo do Camiño de Santiago dirección ao Castelo de Pambre, para acto seguido pasar polo Concello de Monterroso. Está previsto que o percorrido, duns 30 quilómetros, dure ao redor de 4 horas horas e remate en Antas de Ulla, onde terá lugar unha cea, ás 22:00 horas, aberta a todo o que queira asistir sen necesidade de facer a ruta.
O prezo por participar só na ruta é de 10 euros, e con cea incluída 22 euros para adultos e 11 para nenos e mozos de menos de 18 anos de idade. O ticket da ruta inclúe tamén servizo de bus para recoller remolques e de ferrador e veterinario durante o percorrido. Os interesados teñen de prazo ata este venres, día previo á celebración do evento, para realizar as inscricións e reservas. Para isto, poden chamar ao número de teléfono 662 93 45 36, habilitado pola organización.
Compromiso coas asociacións da provincia
Con esta nova colaboración, a Fundación TIC afianza o compromiso que iniciou hai un ano coa Asociación Cabaleiros da Ulloa na difusión das súas actividades. García Porto salientou que deste xeito a TIC continúa co seu apoio ás asociacións culturais e sociais da provincia a través da sinatura de convenios de colaboración, co fin de divulgar o labor que realizan estes colectivos con produtos audiovisuais. Ademais, estes acordos continuou a Deputada, ofrecen formación práctica e de calidade aos nosos alumnos e bolseiros, unha das principais prioridades que levamos a cabo desde a TIC.
A Asociación Cabaleiros da Ulloa nace en 1995 da man dun grupo de afeccionados aos cabalos na comarca da Ulloa. Entre as principais accións da agrupación está a de dar a coñecer a riqueza cultural, histórica e patrimonial da comarca e dos Concellos aos que pertencen, a través do mundo equino.
