A Deputación colabora coa USC na posta en marcha do Campus de verán en Guitiriz
![Imaxe deputación de lugo](/sites/deputacionlugo.org/files/default_images/depulugo001.jpg)
As actividades, que contan co apoio da institución provincial a través da Fundación TIC, desenvolveranse desde o 7 ó 19 de xullo O Presidente da Deputación, José Ramón Gómez Besteiro, acompañado do Vicerreitor do Campus de Lugo, Carlos Herrero, da Alcaldesa de Guitiriz, Regina Polín, do director e subdirector dos cursos, Roxelio Moreira e Javier López González, inaugurou o Campus de Verán que a Universidade de Santiago de Compostela, en colaboración coa Fundación TIC, pon en marcha no municipio chairego. Gómez Besteiro destacou que a Deputación quixo colaborar con esta iniciativa porque permite poñer en valor a riqueza medioambiental que temos e que atopa neste Concello un dos buques insignias, xa que é un dos municipios da provincia que máis aposta polo medio ambiente e pola sostibilidade. Proba diso é que Guitiriz foi declarado en 2006 pola Xunta de Galicia núcleo de sostibilidade. A Alcaldesa soubo entender cal é o punto de distinción deste municipio. Os cursos desenvolveranse desde o 7 ó 19 de xullo na Casa Habanera de Guitiriz. O primeiro, cultura e paisaxe, celebrarase ata o día 10 e dispón de 20 horas de formación. O de xestión das augas residuais no ámbito rural conta con 20 horas lectivas e desenvolverase os días 13, 14 e 15. Finalmente, terá lugar o de comunicación e deporte, que se celebrará desde o 17 ó 19 de xullo. A Deputación colabora a través da Fundación TIC na realización dos cursos porque consideramos que unha das funcións da Fundación é exportar esa imaxe de provincia medioambiental ó tempo que se presta apoio na xeración de contidos que faciliten ós Concellos afrontar os novos retos. A realización deste curso é un exemplo desta cooperación. O titular provincial tamén destacou o emprazamento das actividades, xa que non podían celebrarse noutro Concello que non fose este. Responden ó compromiso da súa Alcaldesa e ó seu empeño por ofrecer servizos de calidade ós seus veciños e veciñas. Proba disto, é a calidade dos ponentes que participarán nesta iniciativa, na que se debaterá a relación entre a cultura e a paisaxe e a comunicación e o deporte, ademais da xestión de augas residuais no ámbito rural. Ademais das ponencias, o cursos compleméntanse con actividades máis lúdicas como o teatro, a danza, e actuacións musicais. Os alumnos da USC recibirán un crédito de libre configuración pola súa asistencia.