A Deputación estende este ano as actividades lúdico medioambientais de Lugoteando á Montaña e á Costa

A gran acollida que tivo o pasado ano o programa lúdico medioambiental Lugoteando levou á Deputación a repetir neste 2011 a orixinal iniciativa que potencia o río, ampliando o número de actividades e as localizacións nas que se levarán a cabo. Ademais do Miño ó seu paso pola capital, esténdese á Montaña e á Mariña. O Concello de Lugo volve colaborar na 2ª edición que presentaron este xoves na área recreativa dos Robles o Presidente Provincial, José Ramón Gómez Besteiro, e o Alcalde lucense, José López Orozco.

Ambos os dous destacaron que “este innovador programa de ocio ecolóxico responde ó Plan Director do Río que puxemos en marcha, ó igual que o traslado e ampliación da UNED no antigo hotel Miño, a nova ponte sobre o río Miño, a construción da pasarela peonil xunto ó Club Fluvial ou as próximas expropiacións fronte a Arias Nadela para completar o Paseo do Miño” porque, coincidiron, “a posta en valor do río significa máis ingresos para a cidade e máis turismo”. Ó respecto do Plan Director, avanzaron que na Xunta de Goberno provincial da vindeira semana adxudicaranse as primeiras obras: a construción de pantaláns para a zona de baño no río Miño por valor de 177.000 euros, ademais da creación do parque infantil cuberto na zona do recinto feiral dotado de 182.182 euros. Orozco destacou que, á espera de lograr a declaración de zona de baño por parte da Xunta de Galicia, está previsto que este verán esté en funcionamento a Praia Fluvial.

Actividades

As actividades, entre o 7 de maio e 26 de xuño, están dirixidas a toda familia e custan 5 euros por persoa para potenciar a participación. Na oferta mantéñense as de maior aceptación o ano pasado: bolas e bananas acuáticas para flotar sobre a auga; os sea-scooter para mergullarse como golfiños; rutas pola ribeira dirixidas por expertos en bioloxía; xogos infantís acuáticos; paddle surf, que tonifica todos os músculos ó remar a bordo de táboas de surf; e wakeboard, combinación entre esquí acuático e snowboard que consiste en manter o equilibrio sobre unha táboa.

A todas elas, incorpóranse novidades como a práctica de kite surf, unha variante espectacular deste deporte que non deixa de gañar adeptos na provincia e que incorpora cometas; paseos en batuxo –antigas barcas de madeira hoxe moi difíciles de ver- e circuítos por terra en monopatíns eléctricos.

Esta serie de propostas desenvolveranse en Lugo e nas praias mariñanas, mentres que para A Montaña organizáronse algunhas diferentes, mantendo os paseos en patíns eléctricos pero incorpóranse xogos en piscinas e con cometas, entre outros.

Datas por localizacións

As actividades arrincarán na Montaña e procurarán a participación de toda a comarca, o 7 de maio en Becerreá e o 8 en Fonsagrada. Continuarán na capital da provincia os días 14, 15, 21, 22, 28 e 29 de maio e o 4 e 5 de xuño. Na Costa terán lugar os días 11 e 12 de maio en Foz, 18 e 19 en Burela, e 25 e 26 en Ribadeo. Celebraranse en quendas no horario de 11:00-14:00 horas e de 16:00-19:00.

O programa inclúe de novo a modalidade Ligoteando, que ten como escenario o río Miño, pero esta vez oferta tres novas versións que comezarán ás 20:00 horas:

- Paseos Chill Out: travesía en catamarán amenizada por un Dj con música chill out, pinchos e degustación dun cóctel elaborado con produtos autóctonos da provincia. Días: 13 e 27 de maio, e 4 de xuño. Prezo: 15 euros.

- Noites Máxicas: paseo en catamarán cun espectáculo de ilusionismo e maxia, máis degustación de pinchos. Días: 14 e 21 de maio. 15 euros.

- Paseos Románticos en batuxo: experiencia de 30 minutos nun batuxo tradicional no que a parella gozará dun paseo polo Miño, conducida por un remeiro, e degustará un cóctel de produtos autóctonos. Días: 20 e 28 de maio. Prezo: 10 euros

Como inscribirse

A inscrición en Lugoteando pode facerse desde hoxe nos números de teléfono 982.12.00.64 ou 609.90.32.11 ou ben in situ, antes de que comece cada actividade –o que non asegura que haxa prazas libres-. O pago poderase efectuar previamente na conta bancaria de Banesto: 0030-7060-30-0298064273 co concepto Lugoteando, ou tamén antes de cada actividade. Máis info: www.deputacionlugo.org ou www.lugo.es ou chamando ó teléfono de información municipal 010 do Concello de Lugo. No caso dos menores de idade, terán que presentar unha autorización asinada dos pais ou titores, que poden descargar nas web.