Lara Méndez avoga pola cooperación dos sectores público e privado na construción do futuro económico do país
A Vicepresidenta Segunda, Lara Méndez, inaugurou este xoves o cuarto debate do ciclo Galicia en clave económica, organizado pola Deputación e Economía Digital, coa colaboración do Grupo El Progreso.
Lara Méndez avogou pola cooperación entre os sectores público e privado e a súa implicación na creación dunha industria que aposte por investir en proxectos innovadores como os nacidos dos spin-off académicos e conseguir crear empresas competitivas en colaboración co persoal investigador. A Vicepresidenta salientou o carácter emprendedor de Galicia e a necesidade de corresponder a ese espírito dende as Administracións, a implicación de todos os axentes políticos e sociais para acadar melloras na competitividade a través da innovación, non só nos sectores máis punteiros, senón tamén nas actividades máis tradicionais
Neste senso, Méndez salientou a oportunidade que supón o programa marco da Unión Europea para a investigación e innovación Horizonte 202, que porá a disposición dos países membros máis de 70.000 millóns de euros.
Lara Méndez fixo estas declaracións no debate no que participaron o Catedrático de Organización de Empresas da Universidade de Vigo, Jorge González Gurriarán; o Catedrático de Economía Aplicada da Universidade da Coruña, Xaquín Álvarez Corbacho; e o Catedrático de Socioloxía da Universidade da Coruña, Antonio Izquierdo Escribano.
A Fundación TIC, como en anteriores ocasións, encargouse da retransmisión en directo da cita en streaming a través da web do organismo provincial www.deputacionlugo.org. O ciclo de debates sobre a situación económica continuará no mes de decembro cunha charla sobre alternativas laborais ó paro.
