A Deputación mantén 200 empregos na Zona Sur coa creación de 4 novas rutas gastronómicas
A Deputación mantén 200 postos de traballo de 67 empresas da Zona Sur coa creación de 4 novas rutas gastronómicas. Son os establecementos que acadaron as marcas de calidade Lug02 e LugoSabe e que participan de xeito gratuíto na iniciativa do organismo provincial. O programa, financiado con fondos europeos, involucra ás empresas ó paso da ruta, impulsando o emprego nestes municipios a través dos recursos naturais de cada zona.
A Deputada de Medio Ambiente e Enerxías Renovables, Sonsoles López Izquierdo, deu conta desta iniciativa ós empresarios da Zona Sur durante unha reunión en Monforte na que se presentaron as rutas dedicadas ó viño e a paisaxe da Ribeira Sacra. López Izquierdo insistiu en que os percorridos destacan os valores medio ambientais e naturais da Zona Sur da provincia, recursos que supoñen unha importante oportunidade económica para os negocios da zona, impulsando a súa actividade, xerando emprego e fixando poboación neste territorio. Deste xeito, as rutas percorren lugares de interese, destacando en cada caso aspectos do patrimonio natural e gastronómico. Propoñen a visita a empresas produtoras, con degustación de produtos nalgúns casos; a realización de actividades de aventura; a estancia en hoteis ou comidas en restaurantes, entre outras alternativas.
Na Zona Sur as rutas son as seguintes:
- O Mel e os seus beneficios, é unha ruta gastronómica ó redor dun dos produtos autóctonos máis importantes da comarca. Percorre os municipios de Quiroga, Pobra de Brollón e Ribas de Sil involucrando a 6 establecementos hostaleiros, 4 restaurantes e 3 empresas produtoras, entre as que tamén se atopan adegas de viño. A ruta propón, ademais, dar un paseo polo río Sil e visitar os museos etnográfico e xeolóxico de Quiroga.
- Quiroga e o seu legado artesanal, involucra no seu percorrido a 6 establecementos hostaleiros, 4 restaurantes e 3 empresas produtoras e propón actividades de aventura como rutas de sendeirismo, parapente ou descenso polos Canóns do Sil. Son en total 9 empresas que dan traballo directo a 22 persoas na zona.
- Recorrendo a pé a Ribeira Sacra, pasa polos municipios do Saviñao, Chantada e Taboada, involucrando a 8 aloxamentos, 8 restaurantes e 9 adegas. A ruta propón a visita a lugares de interese como a Igrexa de santo Estevo de Ribas de Miño ou o Ecomuseo de Arxeriz. En total son 21 empresas con 70 traballadores involucrados.
-Recuperando as variedades autóctonas de uva nos bancais do Sil, involucra a 37 empresas con 210 traballadores ó seu paso por Monforte de Lemos, Sober e Pantón. Propón comer en 18 restaurantes da zona, aloxamento en 14 establecementos e a visita a 5 adegas ademais de numerosas ofertas de ocio que van dende rutas en catamarán ou museos de arte sacro e monumentos arquitectónicos, entre outros.
13 rutas na provincia
En toda a provincia, son 13 os roteiros creados pola Deputación que destacan, en cada caso, os produtos autóctonos propios de cada zona e a súa riqueza natural e patrimonial. Deste xeito, a iniciativa destaca alimentos como a faba de Lourenzá, o porco celta, ou o queixo da Montaña e da Ulloa, entre outros. Os percorridos están deseñados para impulsar o comercio local a través dos valores naturais e culturais de cada zona. A iniciativa involucra a 211 empresas con 1.100 postos de traballo que a Deputación contribúe a manter. Nestes días os responsables da iniciativa están a realizar xuntanzas para explicarlles ás PEMES e autónomos participantes as posibilidades de colaboración. No mes de decembro celebraranse dúas reunións en Monforte e Chantada para falar coas empresas involucradas nas rutas da Ribeira Sacra.
