A Deputación ofrece formación gratuíta para potenciar a explotación dos soutos de castiñeiros na Montaña
A Deputación organizou este mércores en Becerreá unha nova acción formativa gratuíta que nesta ocasión analizou as posibilidades de explotación dos soutos de castiñeiros nas Montañas dos Ancares Lucenses. O Deputado de Xestión Territorial, Manuel Martínez, participou na iniciativa que forma parte do Fórmate en Verde, co que organismo provincial impulsa a formación sobre profesións de futuro. O catedrático de Produción Vexetal da Universidade de Santiago de Compostela, Antonio Rigueiro, foi o encargado de analizar o carácter ecolóxico dos soutos, a súa implantación, o tipo de planta a utilizar, como os hábitos de vida inciden na súa explotación, as enfermidades que padecen e os produtos que se poden comercializar como resultado do seu cultivo.
Na sesión abordouse a relevancia que esta árbore ten na comarca da Montaña lucense pola súa abundancia e pola importancia económica, social e paisaxística dos soutos. Antonio Rigueiro expuxo os problemas de tipo sanitario destas árbores e as solucións a estas doenzas para conseguir mellorar a produción. O catedrático insistiu na repercusión económica dos soutos e os produtos derivados para esta comarca. Galicia comercializa o 50% das castañas que se poñen á venda en toda España e conta dende o 2009 coa Indicación Xeográfica Protexida, que aumenta o valor do produto. A provincia de Lugo concentra o 30% da produción deste cultivo en Galicia e a Comarca da Montaña conta con 2.827 hectáreas de soutos, polo que a explotación da castaña e outros derivados do castiñeiro supoñen unha alternativa laboral de futuro. Deste xeito, a sesión formativa deste mércores incluíu a análise das posibilidades de comercializar outros produtos relacionados cos soutos, como os cogomelos ou a madeira.
O programa Fórmate en Verde ofrece formación gratuíta a 1.400 lucenses en profesións de futuro relacionadas cos sectores da agricultura, gandería ou forestal, co obxectivo de crear ou reconverter as súas empresas, xerando emprego na provincia.
