A Deputación de Lugo colabora coa segunda edición da exposición Vestimenta Lucus Augusti
A Deputada de Artesanía e Deseño, Regina Polín, inaugurou hoxe a exposición organizada pola Asociación Lugo Monumental, que agrupa a comercios e negocios do casco histórico da capital lucense e que leva por título Vestimenta Lucus Augusti. Esta pasarela de moda romana tivo como escenario o Salón Rexio do Círculo das Artes e trata de dar a coñecer as tendencias da moda e complementos para a elección da caracterización da festa de Arde Lucus, declarada de Interese Turístico Galego.
Tal e como destacaron os seus organizadores, non se trata dun mercado de venta directa senón dun escaparate onde os interesados poderán ver as propostas de cada un dos expositores, e mesmo encargar os seus artigos dándolles un toque persoal. Deste xeito, pretenden cubrir as demandas de dos lucenses, a dous meses para a celebración do Arde Lucus, importante revulsivo económico para a cidade ó atraer en cada edición a milleiros de visitantes, número que se incrementa ano tras ano.
A Deputación, como mostra da aposta polo comercio local, decidiu colaborar novamente con esta pasarela, achegando a tres artesáns que realizaron demostracións en vivo ante a mirada dos lucences na Praza do Campo. A colaboración da institución luguesa coa festa do Arde Lucus vén de hai anos, xa que esta cita atrae ó maior número de visitantes a Lugo, sendo só superada polo San Froilán, cun millón de persoas, acadando o 100% da ocupación hoteleira e xerando un volume de negocio de 10 millóns de euros.