Alfredo Llano: A Conselleira reprobada volve á provincia burlarse dos mariñanos e de todos os lucenses
![Imaxe deputación de lugo](/sites/deputacionlugo.org/files/default_images/depulugo001.jpg)
O Deputado provincial pola Mariña Alfredo Llano lamentou que a Conselleira reprobada de Sanidade volva á provincia burlarse dos mariñanos e de todos os lucenses, despois de negarnos reiteradamente os mesmos servizos de Hemodinámica 24 horas e Radioterapia que teñen o resto dos galegos, despois de todo o que nos quitou aos veciños da Mariña, e despois de desvalorizar o Hospital da Costa ata límites descoñecidos, como denuncian os propios profesionais sanitarios.
Para Llano, a visita que fixo este venres Rocío Mosquera a Burela para presentar á nova xerente do centro hospitalario da Mariña supuxo unha tomadura de pelo máis, outro engano, ao anunciar por enésima vez a ampliación e melloras do hospital, cando saben que, en canto pasen as eleccións locais, volverán a deixar durmir nun caixón estes proxectos, e ao gabar a Xestión Integrada, cando o certo é que todo foi a peor con este sistema. Eliminou a capacidade resolutiva e supuxo a perda de servizos asistenciais, o que ocasiona graves dificultades aos pacientes, aos profesionais e, como demostran os feitos, aos propios xestores do hospital. Deste xeito, Llano reivindicou que o centro burelés recupere a autonomía de xestión.
O Deputado, responsable provincial de Economía do Coñecemento, Emprendedores e Innovación, destacou así mesmo que os continuos cambios na xerencia do Hospital da Costa, con catro responsables en seis anos e un que xa nin aceptou, ratifica a extraordinaria mala xestión da Conselleira e demostra que non a queren nin os seus, pois trátase dun posto de confianza. Como non vai estar reprobada na provincia?, engadiu.