O Presidente e a Alcaldesa de Lugoabrazan a muralla xunto a centos de veciños en defensa das familias que sofren enfermidades raras
O Presidente, Darío Campos Conde, e a Alcaldesa de Lugo, Lara Méndez, participaron este mércores, acompañados de centos de veciños, no abrazo reivindicativo á Muralla, no que solicitaron un maior compromiso das administracións competentes coa sanidade pública do país; máis concretamente no eido das enfermidades raras. No acto, tamén participaron o Presidente de ANASBABI Ciliopatías, José Carlos Pumar, así como outras autoridades a nivel galego e provincial.
Campos Conde subliñou que a través deste acto, damos visibilidade ás enfermidades raras, ao tempo que solicitamos un compromiso real das administracións autonómica e central coa sanidade pública do país. Neste senso, o titular provincial lembrou a necesidade de continuar traballando para garantir un acceso en condicións da cidadanía á sanidade, sobre todo tendo en conta os recortes levados a cabo pola Xunta de Galicia durante os últimos anos.
Compre subliñar que o Goberno da Xunta reduciu o orzamento sanitario en 26 millóns de euros, o 30% do orzamento total; así como a partida de gastos correntes de funcionamento, recortado en máis de 20 millóns de euros.
O titular provincial avogou tamén por aumentar a formación dos profesionais sanitarios no tocante ás enfermidades raras, co fin de introducir un cambio de enfoque á hora de avaliar estas doenzas, tanto na atención primaria, como na especialidade; xa que este tipo de enfermidades non poden ser tratadas como as outras.
Deste xeito, Campos Conde apostou por crear un libro branco sobre as Ciliopatías, na que participen os profesionais sanitarios implicados, para coordinar e elaborar un proceso multidisciplinar, que ofreza unha avaliación e diagnostico o máis axeitado posible.
Lara Méndez subliñou que a través deste abrazo reivindicativo, dáse voz e visibilidade ás persoas que sofren algún tipo de enfermidade desta natureza, que só en Galicia afecta a máis de 300.000 persoas.
Nesta liña, Méndez quixo ensalzar o papel de todas as asociacións e colectivos que axudan a concienciar sobre a realidade que viven os enfermos e que apoian tanto aos propio doentes como aos familiares. Non se pode excluír a ninguén, a loita é de todos, asegurou a Alcaldesa, quen subliñou que unha sociedade que exclúe a unha das súas partes, non é nin xusta, nin equitativa nin igualitaria.
Pola súa banda, Juan Carlos Pumar quixo agradecer a colaboración institucional con esta iniciativa. Para nós é un orgullo ver como Concello e Deputación se implican coa causa das enfermidades raras, subliñou o Presidente de ANASBABI, quen se amosou convencido de que tanto a entidade local como a provincial seguirán axudando con esta loita.
