Deputación de Lugo

O Goberno da Deputación organiza unha xornada informativa e aberta sobre a nova Lei de Espectáculos Públicos de Galicia

Imaxe deputación de lugo
- O evento, que terá lugar o mércores, 27 de xuño a partir das 10:00 horas, no Pazo de San Marcos, ten como obxectivo abordar os aspectos máis relevantes da nova normativa e as implicacións da súa entrada en vigor nos Concellos en xullo- A xornada, impartida por tres expertos, está dirixida a secretarios, interventores, policías locais, e demais persoal ao servizo dos entes locais e do sector público local -Abordaranse aspectos como a protección dos menores, a defensa dos consumidores e usuarios, o respecto polo medio ambiente e os animais, a loita contra actitudes discriminatorias e a conservación do noso patrimonio histórico-artístico e cultural- A Lei 10/2017, do 27 de decembro, de espectáculos públicos e actividades recreativas de Galicia é a primeira norma autonómica con rango legal que establece unha regulación xenérica, actualizada e de carácter global desta materia

O Goberno da Deputación organiza o vindeiro mércores, 27 de xuño a partir das 10:00 horas, no salón de actos do Pazo de San Marcos, unha xornada informativa e totalmente aberta sobre a nova Lei de Espectáculos Públicos e actividades recreativas de Galicia, que entrará en vigor no mes de xullo. A xornada está dirixida a secretarios, interventores, policías locais, e demais persoal ao servizo dos entes locais e do sector público local, co obxectivo de abordar os aspectos máis relevantes da nova normativa e as implicacións da súa entrada en vigor nos Concellos.

Ao longo da mañá haberá tres relatorios impartidos por: Ana Purificación Otero Ferreiro, Subdirectora Xeral de Xogo e Espectáculos Públicos da Dirección Xeral de Emerxencias e Interior; Jesús Lata Buceta, Xefe de Servizo de Espectáculos Públicos e Desenvolvemento Normativo da Dirección Xeral de Emerxencias e Interior; e Isabel Varela López, Xefa de Sección do Negociado de Policía, Tráfico e Transporte do Concello de Lugo. Abordaranse, entre outros, aspectos tales como a protección dos menores, a defensa das persoas consumidoras e usuarias, o respecto polo medio ambiente e os animais, a loita contra actitudes discriminatorias e a conservación do noso patrimonio histórico-artístico e cultural.

A Lei 10/2017, do 27 de decembro, de espectáculos públicos e actividades recreativas de Galicia é a primeira norma autonómica con rango legal que establece unha regulación xenérica, actualizada e de carácter global desta materia e enche o baleiro normativo autonómico existente na actualidade. A normativa establece o réxime xurídico dos espectáculos públicos e das actividades recreativas que se celebren en establecementos ou espazos abertos ao público, sempre que se desenvolvan integramente no territorio da Comunidade Autónoma.

Programa da xornada

9:45 horas.- Recepción dos asistentes.

10:00 - 11:00 horas.- Aspectos xerais da Lei 10/2017. Especial referencia ás competencias municipais, o réxime de intervención administrativa e as verbenas e festas populares. Por Ana Purificación Otero Ferreiro, Subdirectora Xeral de Xogo e Espectáculos Públicos da Dirección Xeral de Emerxencias e Interior (Xunta de Galicia).

11:00 - 12:00 horas.- Organización e desenvolvemento dos espectáculos públicos e das actividades recreativas. Por Jesús Lata Buceta, Xefe de Servizo de Espectáculos Públicos e Desenvolvemento Normativo da Dirección Xeral de Emerxencias e Interior (Xunta de Galicia).

12:00 horas.- Pausa.

12:30 - 13:30 horas.- Vixilancia e inspección dos establecementos abertos ao público, dos espectáculos públicos e das actividades recreativas. Réxime sancionador. Por Isabel Varela López, Xefa de Sección do Negociado de Policía, Tráfico e Transporte do Excmo. Concello de Lugo.

Últimas Novas