Iniciados os campamentos urbanos que a Deputación pon en marcha este verán en Guitiriz

Trátase de actividades, nunca antes desenvolvidas no Concello chairego, e que pretenden achegar ós máis pequenos a necesidade de preservar o medio ambiente Este mércores deron comezo os campamentos urbanos que o organismo provincial pon en marcha no municipio de Guitiriz dentro o programa europeo Lug02. Durante os meses de xullo e agosto vanse desenvolver na Aula da Natureza de San Xoán de Lagostelle diversas actividades medioambientais englobadas en dous campamentos: Coñece a Natureza -dirixido a nenos e nenas de 3 a 6 anos- e Entende a Natureza –destinado a rapaces de 7 a 16 anos. A actividade dá continuidade á política medioambiental que se está a levar a cabo no organismo provincial, a través do programa europeo Lug02, dotado con 5 millóns de euros e destinado a potenciar os Concellos incluídos nas Reservas da Biosfera e ó medio ambiente nunha oportunidade económica. Nos campamentos, os nenos teñen a oportunidade de participar en actividades moi novidosas e nunca vistas en Guitiriz. En total, participarán uns 200 rapaces. Cada grupo de idade terá actividades dunha semana de duración, de luns a venres, distribuídos do seguinte xeito: 15 ó 31 de xullo (2 grupos de idades de 6 a 12 anos), 3 ó 7 de agosto (grupo de 3 a 6 anos) e do 10 ó 14 de agosto (grupo de 12 a 16 anos ou grupo de varias idades). 9 actividades relacionadas co medio ambiente O programa inclúe xogos e excursións de simulación ambiental que serán impartidos por técnicos especializados. A esta iniciativa, a Deputación destina 30.000 euros. Os rapaces non só descubrirán a riqueza medioambiental senón que tamén aprenderán a valorar o que temos e a preservar o medio natural. En total poderán participar en 9 actividades relacionadas co medio ambiente. Son as seguintes: 1.- DEPURADORAS CASEIRAS: Ó tempo que constrúen a depuradora coñecerán os pasos que hai que seguir para conseguir que a auga sexa potable. 2.- RECICLAXE DE MATERIA ORGÁNICA 3.- O RASTRO DO BOSQUE A través dun paseo pola natureza aprenden a recoñecer, identificar e conservar os rastros e sinais dos animais. 4.- XABÓN CASEIRO Introducirase ós nenos na historia da fabricación de xabón, partindo do aproveitamento de residuos. 5.- ENERXÍA EÓLICA. UN PAPAVENTOS Nesta actividades preténdese amosar ós nenos outras formas de obter enerxía a partir de fontes alternativas e renovables como as do vento e a auga. 6.- PATRULLA VERDE Nesta actividade o obxectivo principal é concienciar ós participantes da importancia de Reducir, Reutilizar e Reciclar, ensinando a separar o lixo nos contedores adecuados. 7.- O CICLO DA AUGA Desenvolveranse charlas, talleres e proxectaranse vídeos onde os nenos apreciarán e entenderán a relevancia de facer un uso axeitado da auga. 8.- ENERXÍA SOLAR. AS COCIÑAS SOLARES Construirán cociñas solares valéndose unicamente dos raios do sol. 9.- RECICLAXE DE PAPEL Participarán en talleres nos que se lles ensinará a reciclar elementos como o papel ou o cartón.