O artesán Joan Farré impartirá o último curso de cestería do programa de inverno do CENTRAD
A modalidade de construción con vimbio vivo centra o último curso do programa de inverno do Centro de Artesanía e Deseño, dependente da Deputación de Lugo. Desde mañá día 5 ata o 7 de marzo, os asistentes aprenderán a elaborar distintos elementos de mobiliario exterior empregando como material o vimbio vivo. O curso, dotado de 24 horas, é impartido polo artesán Joan Farré en horario de 10:00 a 14:00 e de 16:00 a 20:00 horas no Centro de Cestería do río Rato. Consta de 10 prazas e está dirixido a cesteiros, artesáns e ó público en xeral. Obradoiros portátiles Os escolares de Primaria e Secundaria da provincia están a ser os destinatarios dos obradoiros portátiles de tapiz, cestería e instrumentos organizados polo CENTRAD. Deste xeito, os alumnos do CEIP de Albeiros de Lugo están a descubrir as principais técnicas do tapiz, mentres que os dos IES de Meira e Parga teñen a oportunidade de aprender cal é o proceso e o método empregado para a elaboración dos instrumentos musicais tradicionais. Pola súa banda, os alumnos dos CEIP de Xermade e Mosteiro (Pol) aprenden unha das profesións tradicionais máis carácterísticas, a cestería. O obxectivo destes obradoiros é recuperar os oficios artesanais desde a etapa escolar dándolles ós rapaces a oportunidade de aprender e coñecer oficios de grande tradición na provincia. 35 colexios serán os destinatarios destes cursos organizados polo Centro de Artesanía e Deseño. Asimesmo, a vindeira semana, desde o luns día 10 ata o mércores 12, o Colexio de Infantil e Primaria da Pastoriza acollerá os obradoiros de fabricación de instrumentos e tapiz, mentres que nos CEIP de Palas de Rei e Albeiros de Lugo o tema será a cestería. Neste último colexio, o obradoiro prolongarase ata o venres, 14 de marzo.
