Antón Bao recibiu ao campión mundial de triatlon, Xabier Gómez Noia
O triatleta galego Xabier Gómez Noia foi recibido esta mañá por representantes do goberno da Deputación de Lugo. Gómez Noia mantivo unha xuntanza co Vicepresidente Primeiro da Deputación, Antón Bao, co Responsable da Área de Deportes,Antonio Veiga e con representantes de todos os grupos políticos no despacho do vicepresidente. Gomez Noia visitou a Deputación de Lugo tras alzarse neste mes de xuño, na cidade canadiense de Vancouver, co título de campeón do mundo. A proba canadiense foi dominada dende o inicio ata o final polo triatleta galego. O outro triatleta galego, que foi campeón do mundo no ano 2006, Iván Raña acadou o posto decimo noveno nesta proba. Antón Bao fíxolle entrega a Xabier Gómez Noia da camisa oficial, co logotipo da Área de Deportes e co escudo da Deputación, que o atleta galego lucirá na olimpíada de Pekin. Xabier Gomez Noia, de 25 anos, atópase no seu mellor momento deportivo e o seu próximo obxectivo será o de acadar a medalla de ouro nos Xogos Olímpicos de Pekin. O Vicepresidente Primeiro da Deputación,Antón Bao destacou a importancia do traballo realizado por deportistas, que como Gómez Noia e Iván Raña, se atopan na elite da disciplina do tríatlon a nivel mundial. Segundo Antón Bao é unha responsabilidade para os que gobernamos as institucións galegas potenciar e poñer en valor aos deportistas que, sen practicar deportes maioritarios, nos representan en todo o mundo e serven de seña de identidade para todos os rapaces e rapazas que escomenzan a practicar diversas disciplinas deportivas nos clubes e escolas deportivas de todo o país. UN DURO CAMIÑO DENDE GALIZA ATA PEKIN Gómez Noia vai disputar os seus primeiros Xogos Olímpicos en Pequín nun deporte, o tríatlon, que comeza cun quilómetro e medio de natación, seguido de 40 quilómetros en bicicleta e que culmina cunha carreira de 10 quilómetros. Javier Gómez Noia, chegará ás olimpíadas con toda a ilusión tras anos de problemas coas autoridades deportivas españolas, que lle privaron da licenza para competir por unha anomalía cardíaca. A súa loita durou seis anos. El, convencido polos seus cardiólogos de que a súa condición non é perigosa, intentou seguir competindo co apoio da federación galega e en 2003 proclamouse campión do mundo sub-23. Finalmente, en febreiro de 2006, o CSD e a Federación Española acaban cambiando de opinión. Noia non se baixou practicamente do podio en todas as probas internacionais desde fai dous anos, foi bicampeón da Copa do Mundo - un circuíto anual de 14 probas -, subcampión do mundo e campión de Europa en 2007, e agora, tras acadar o campeonato do mundo, lidera a clasificación olímpica e a clasificación por puntos da Federación Internacional.
