Vive o Verán en Lugo inicia a súa andaina no Pazo de Feiras e Congresos
A primeira edición dos Campamentos Urbáns de Verán en Lugo, Vive o verán en Lugo, abriron hoxe as súas portas nas instalacións do Pazo de Feiras e Congresos de Lugo. O acto de inauguración contou coa presencia de Antonio Gato, Portavoz da Deputación Provincial de Lugo; Carmen Basadre, Concelleira de Benestar Social, Muller e Xuventude do Concello de Lugo; Rubén López, Director-Xerente do Pazo de Feiras e Congresos de Lugo; Juan Escobal de NCD Eventos. A presentación foi introducida por Jesús Vázquez Tallón, Coordinador xeral dos campamentos Vive o Verán en Lugo. Xa pola mañá o Pazo de Feiras recibiu aos cativos participantes na primeira quincena dos Campamentos, un total de 130 rapaces. Durante os dous meses que durará o evento, serán máis de 350 os participantes, todo un éxito de participación, dado que é a primeira edición do evento. Vive o Verán en Lugo Vive o Verán en Lugo desenvolverase nas inmediacións e no Pazo de Feiras e Congresos de Lugo nos meses de xullo e agosto, en catro quendas dacordo coas quincenas dos respectivos meses. Ademais de nas instalacións do Pazo de Feiras e Congresos de Lugo terán lugar diversas actividades no Polideportivo El Palomar, no Campo de Fútbol Municipal da Cheda ou no Club Fluvial, entre outros. En canto a saídas de carácter cultural, levaranse a cabo unha delas en cada grupo de idade ao Centro de Interpretación do Rato e á Reserva da Biosfera, dependentes do INLUDES. Así mesmo terá lugar unha excursión de final dos campamentos á Granxa Escola Garabullos en Sistallo (Cospeito) para o grupo de 4 a 8 anos e outra ao Parque Acuático de Cerceda para o grupo de 9 a 16 anos.
